تۇركياداعى ورمان ءورتى اۋىزدىقتالار ەمەس: ءبىر ادامنىڭ جاعدايى اۋىر

استانا. KAZINFORM - اۋا تەمپەراتۋراسىنىڭ كوتەرىلۋىنە بايلانىستى تۇركيانىڭ بىرنەشە ايماعىنداعى ورمان ءورتى ءالى دە وشىرىلگەن جوق. سوڭعى بەس كۇن ىشىندە ەل بويىنشا 342 ورمان ءورتى تىركەلگەن، ونىڭ 6 اۋى ءالى سوندىرىلمەگەن، دەپ جازدى AZƏRTAC.

تۇركيانىڭ اۋىل جانە ورمان شارۋاشىلىعى ءمينيسترى يبراگيم يۋماكلى وسى ماسەلەگە بايلانىستى مالىمدەمە جاسادى.

ءمينيستردىڭ ايتۋىنشا، ەلدىڭ ءارتۇرلى ايماقتارىندا تۇتانعان ورتپەن كۇرەسۋ ءۇشىن اۋەدەن دە، جەردەن دە ءسوندىرۋ جۇمىستارى جۇرگىزىلىپ جاتىر. قازىرگى ۋاقىتتا ءورت مانيسا، يزمير جانە حاتاي ايماقتارىندا ءالى دە اۋىزدىقتالماي وتىر.

يۋماكلى اتاپ وتكەندەي، يزميردەگى سەفەريحيسار جانە مەندەرەس اۋداندارىنداعى جاعداي كەشەگىمەن سالىستىرعاندا ءبىرشاما جاقسارعان. يزمير مەن مانيسادا ءتۇن ىشىندە جۇرگىزىلگەن قارقىندى شارالاردىڭ ناتيجەسىندە ءورتتىڭ سالدارى ازايتىلعان. ال حاتايدىڭ انتاكيا اۋدانىندا قاتتى جەل ءورتتى سوندىرۋگە كەدەرگى كەلتىرىپ جاتىر. ادانا قالاسىندا جاعداي باقىلاۋعا الىنعان.

سونداي-اق، تۇركيانىڭ دەنساۋلىق ساقتاۋ ءمينيسترى كەمال مەميشوعلۋ مالىمدەگەندەي، ەلدىڭ ءارتۇرلى وڭىرلەرىندەگى ورمان ورتتەرىنەن زارداپ شەككەن 46 ازامات اۋرۋحانالاردا ەم قابىلداپ جاتىر، ولاردىڭ ءبىرىنىڭ جاعدايى اۋىر.

ەسكە سالا كەتەيىك، بۇعان دەيىن تۇرىك پروكۋراتۋراسى 7 پروۆينتسيادا ورتتەردى زەرتتەۋ قورىتىندىسىنا ساي 22 كۇدىكتىگە قاتىستى تەرگەۋ جۇرگىزىپ جاتقانىن جازعان ەدىك. ولاردىڭ 9 ى قاماۋعا الىنىپ، 5 ادام سوت الدىندا باقىلاۋدا، 7 ادام ۋاقىتشا قاماقتا وتىر، تاعى ءبىر تۇلعا جاۋاپ الىنىپ بوساتىلعان.