تۇركياداعى تەراكتىدەن زارداپ شەككەن قازاقستاندىقتار جوق – س ءى م
استانا. KAZINFORM - كەشە تۇركيا استاناسى انكارا قالاسىندا لاڭكەستىك ارەكەت جاسالدى. وكىنىشكە قاراي، قۇربان بولعاندار مەن جارالانعاندار بارى ايتىلدى. وسى ورايدا ەلىمىزدىڭ سىرتقى ىستەر مينيسترلىگىنەن قازاقستان ازاماتتارىنىڭ قاۋىپسىزدىگى تۋرالى سۇراعان ەدىك.
«قازا بولعاندار مەن زارداپ شەككەندەردىڭ اراسىندا ءبىزدىڭ ازاماتتار جوق»، - دەپ جاۋاپ بەردى سىرتقى ىستەر مينيسترلىگىنىڭ رەسمي وكىلى ايبەك سمادياروۆ اگەنتتىك تىلشىسىنە.
ايتا كەتەيىك، كەشە تۇركيانىڭ انكارا قالاسىندا اسكەري ۇشاقتار مەن عارىش تەحنيكاسىن شىعاراتىن TUSAŞ كورپوراتسياسى عيماراتىنىڭ جانىندا تەراكت بولدى.
قايعىلى وقيعادان سوڭ مەملەكەت باسشىسى قاسىم-جومارت توقايەۆ رەجەپ تايپ ەردوعانعا كوڭىل ايتۋ جەدەلحاتىن جولدادى.
تۇركيانىڭ ىشكى ىستەر ءمينيسترى الي يەرليكايانىڭ مالىمدەسىندە تۇركيانىڭ TUSAŞ اەروعارىش كومپانياسىنىڭ نىسانىنداعى تەراكت سالدارىنان 4 ادام قازا تاۋىپ، تاعى 14 ادام جاراقات العانى ايتىلعان.
ءمينيستردىڭ ايتۋىنشا، شابۋىلدى جاساعان ەكى لاڭكەس زالالسىزداندىرىلعان. لاڭكەستەردىڭ ءبىرى ايەل.
ۆەدومستۆو باسشىسى جۇرتشىلىقتى بولعان وقيعاعا قاتىستى تەك رەسمي اقپارات كوزدەرىنەن الىنعان اقپاراتقا سەنۋگە شاقىردى.