تۇركياداعى مۇناي وڭدەۋ زاۋىتىندا جارىلىس بولدى

 تۇركيانىڭ يزميتتە ورنالاسقان ەڭ ءىرى مۇناي وڭدەۋ زاۋىتى TÜPRAŞ- دا كۇشتى جارىلىس بولدى، دەپ حابارلايدى Kazinform مەنشىكتى ءتىلشىسى.

كودجاەلي قالالىق مۋنيتسيپاليتەتىنىڭ مەرى تاحير بيۋيۋكاكىننىڭ مالىمدەۋىنشە، جارىلىس جوسپارلانعان جاتتىعۋ كەزىندە بولعان. وقيعا سالدارىنان زارداپ شەككەندەر جوق. جارىلىستان كەيىن زاۋىت اۋماعىنان ءورت شىقتى. بيلىك مالىمەتىنشە، ول تەز ارادا اۋىزدىقتالىپ، باقىلاۋعا الىندى.

قازىرگى كەزدە زاۋىت ماماندارى مەن قاۋىپسىزدىك قىزمەتى بولاشاقتا مۇنداي وقيعالاردىڭ الدىن الۋ ءۇشىن جارىلىستىڭ ناقتى سەبەبىن انىقتاپ جاتىر. زاۋىتتاعى جاعداي قالىپقا كەلتىرىلدى، كاسىپورىن جۇمىسى شتاتتىق رەجيمدە جالعاسادى.

ەسكە سالساق، 22-قازاندا تۇركيانىڭ كودجاەلي پروۆينتسياسىندا ورنالاسقان گەبزە قالاسىنداعى تۇرعىن ۇيلەردىڭ بىرىندە تابيعي گاز جارىلدى. وقيعا سالدارىنان جەتى ادام زارداپ شەكتى، ولاردىڭ ۇشەۋىنىڭ جاعدايى اۋىر.

جارىلىس عيماراتقا ايتارلىقتاي زيان كەلتىردى، ءۇيدىڭ ءبىر بولىگى تولىق دەرلىك قيراپ قالعان.

اۆتور

زارينا تۋعانبايەۆا