تۇركيادا قۇرىلىس پەن اۋىل شارۋاشىلىعى سالاسىندا جۇمىسشى تاپشى

استانا. قازاقپارات - تەحنولوگيانىڭ دامۋى مەن جاڭا سالالاردىڭ وركەندەۋى ەڭبەك نارىعىندا ۇلكەن وزگەرىستەرگە الىپ كەلدى. تۇركيادا قازىرگى تاڭدا قۇرىلىس، اۋىل شارۋاشىلىعى سياقتى ءداستۇرلى سالا ماماندارىنا سۇرانىس ارتقان، دەپ حابارلايدى 24kz.

ال كەي ماماندىقتار بويىنشا جوعارى جالاقى ۇسىنىلعانىنا قاراماستان جۇمىسشىلاردى تابۋ قيىنعا سوعىپ وتىر.

تۇركياداعى ەڭبەك نارىعىندا كەي سالالارداعى كادر تاپشىلىعى، ونىڭ ىشىندە جۇمىسشى مامانداردىڭ جەتىسپەۋشىلىگى قوعامداعى وزەكتى ماسەلەنىڭ بىرىنە اينالعان. اسىرەسە، اۋىل شارۋاشىلىعىندا جۇمىس ىستەيتىن ماماندارعا سۇرانىس وتە جوعارى.

ماسەلەن، تۇركيادا 800 مىڭ تەڭگەدەن اساتىن ايلىققا شوپاندار جەتىسپەيدى. فەرمەرلەر بۇل ىسپەن اينالىساتىن جاندارعا ءۇي بەرىپ، ازىق-تۇلىگىن تەگىن جەتكىزىپ تۇرۋعا دايىن. «ءتىپتى جىلدامدىعى جوعارى ينتەرنەتپەن دە قامتاماسىز ەتەمىز»، - دەيدى. ال، قۇرىلىس سالاسىندا كران جۇرگىزۋشىلەرى مەن تەحنيكالىق وپەراتورلارعا سۇرانىس جوعارى. ءبىراق جالاقىلارى تەڭگەگە شاققاندا 2 ميلليوننان اسسا دا، بۇل سالادا جۇمىسشى تابۋ قيىن. سالدارىنان تەحنيكالىق مامانداردىڭ جەتىسپەۋشىلىگى ايتارلىقتاي قيىندىقتار تۋعىزىپ وتىر.

ياسين دەميركاپى، ينجەنەر:

- قۇرىلىس سالاسىندا ۋنيۆەرسيتەت بىتىرگەن ماماندار كوپ. دەگەنمەن، ءبىز سەكىلدى قىسى-جازى، سۋىق-ىستىقتا قۇرىلىس الاڭىندا جۇمىس ىستەگىسى كەلەتىندەر از. جاس مامانداردىڭ دا تاجىريبەسى از. ال، بىزگە دايىن مامان كەرەك. جوبالارىمىزدى ۋاقىتىندا ساپالى جەتكىزۋىمىز ءتيىس. ءبىزدىڭ كەزىمىزدە جاستايىمىزدان وسىندا قۇرىلىستا جۇمىس ىستەيتىنبىز. ۇستالاردان ۇيرەنىپ، ءوزىمىزدى جەتىلدىرەتىنبىز. جالاقى ماسەلە ەمەس. باستىسى، بىلىكتى ءارى تۇراقتى مامان تابۋ.

جالپى تۇركيادا جۇمىسسىزدار سانى 3 ميلليوننان اسادى. دەسە دە، بۇل الدىڭعى جىلدارمەن سالىستىرعاندا ەداۋىر تومەن. سونىمەن قاتار كەيبىر سالالاردا جۇمىسقا ورنالاسۋ مۇمكىندىكتەرى ارتقان. مىسالى، قاۋىپسىزدىك قىزمەتكەرلەرى، ساتۋشىلار، تۋريزم جانە قىزمەت كورسەتۋ سەكتورىندا وڭ وزگەرىستەر بايقالادى.

ۆەدات ىشىحان، تۇركيانىڭ ەڭبەك جانە الەۋمەتتىك قاۋىپسىزدىك ءمينيسترى:

- 2023 -جىلدىڭ وسى كەزەڭىمەن سالىستىرعاندا جۇمىسپەن قامتىلعاندار سانى 986 مىڭ ادامعا ارتىپ، 32 ميلليون 748 مىڭعا جەتتى. جۇمىسپەن قامتىلۋ دەڭگەيى سول ۋاقىتتا %1,2- كە ءوسىپ، I,6 قۇرادى. قازىر 2023 -جىلدىڭ وسى كەزەڭىمەن سالىستىرعاندا ەڭبەك كۇشى 925 مىڭ ادامعا ارتقانىن كورىپ وتىرمىز.

ەڭبەك نارىعىنداعى بۇل وزگەرىستەر ەلدىڭ ەكونوميكاسىنا دا ءبىرشاما اسەر ەتتى. ەندى بيلىك جۇمىسشى ماماندار تاپشى سالالاردا وسى ماسەلەنى شەشۋ ءۇشىن جاڭا شارالار قابىلداۋدى كوزدەپ وتىر.

24.kz