تۇركيادا قازاق ءتىلىن ۇيرەنۋشىلەر كوبەيدى

تۇركيادا قازاق ءتىلىن ۇيرەنگىسى كەلەتىندەردىڭ قاتارى ارتىپ كەلەدى. العاش رەت بىلتىر انكارا ۋنيۆەرسيتەتىنىڭ ءتىل وقىتۋ ورتالىعىندا قازاق ءتىلى كۋرسى اشىلعان ەدى.

ءبىر جىلدا 50 دەن استام ادام ءتىلدى ەركىن مەڭگەرىپ شىقتى. ءتىلى باسقا بولسا دا، تىلەگى ءبىر بۇل حالىق قازاق تىلىنە ەرەكشە قىزىعادى. سول سەبەپتى ستۋدەنتتەر عانا ەمەس، ءتۇرلى سالادا ەڭبەك ەتىپ جۇرگەن بىلىكتى ماماندار دا ءتىلدى ۇيرەنىپ ءجۇر. كەستەسى تىعىز بولسا دا، ءار ساباقتى قالت جىبەرمەيدى. ءتىپتى كۋرسقا قازاق مادەنيەتىن زەرتتەپ جۇرگەن جاس عالىمدار دا قاتىسىپ ءجۇر.

 حايات دەنيز يلتاش، ەگە ۋنيۆەرسيتەتىنىڭ PHD دوكتورانتى:

- قازاق ءتىلىن ءبىر جىلدان بەرى ۇيرەنىپ ءجۇرمىن. قازىرگى تاڭدا ەركىن مەڭگەردىم. نەگىزى تۇرىك تىلىنە ۇقساس بولعاندىقتان قازاق ءتىلىن ۇيرەنۋ قيىن بولعان جوق. ءدارىستى قازاق ەمەس، تۇرىك وقىتۋشى وتكىزەدى. ۇلتى باسقا بولسا دا، قازاقتىڭ ۇلتتىق قۇندىلىعىن ەركىن مەڭگەرگەن. ءار ساباقتا ءبىلىم الۋشىلارعا حالقىمىزدىڭ ءداستۇرى مەن باي مادەنيەتىن دارىپتەپ وتىرادى.

سيەۆيل كارامان، ءتىل وقىتۋ ورتالىعىنىڭ وقىتۋشىسى:

- قازاقس تىلىنە سۇرانىستار، تالاپتار بولىپ جاتىر. ۋنيۆەرسيتەتىمىزدىڭ ستۋدەنتتەرى كوبىنەسە كەلىپ ۇيرەنىپ جاتىر. جۇمىس ىستەپ جۇرگەن قىزمەتكەرلەر دە قازاقشا ۇيرەنگىسى كەلەدى. تەك قانا ۇيرەنىپ شىعۋمەن شەكتەلمەيدى، قازاق تىلىندە ولەڭ جازاتىندار دا بار. ءتىپتى ءان ايتاتىندار بار. قازاقشا ەركىن سويلەپ جۇرگەندەر دە كوبەيىپ كەلەدى. ساباق تۇرىك ءتىلدى اۋديتورياعا ارنالعان وقۋ قۇرالى ارقىلى وتكىزىلەدى. وقۋلىقتى ەكى جىل بۇرىن جەرگىلىكتى ۇيىمدارمەن بىرلەسىپ، «ءتىل- قازىنا» ۇلتتىق عىلىمي- پراكتيكالىق ورتالىعى ازىرلەگەن. بۇل - باستاپقى دەڭگەيگە ارنالعان. ەندى ورتالىق ماماندارى ورتا دەڭگەي بويىنشا وقۋ قۇرالىن باسىپ شىعارۋدى جوسپارلاپ وتىر.

 تيمۋر گۇلتەكين، ءتىل وقىتۋ ورتالىعىنىڭ ديرەكتورى، پروفەسسور:

 - قازاق ءتىلى كۋرسىن اشۋعا تۇرىك تاريحى، مادەنيەت قورى مەن انكاراداعى قازاقستان ەلشىلىگى مۇرىندىق بولدى. ءبىزدىڭ ماقساتىمىز - تۇركيا مەن قازاقستان اراسىنداعى ديپلوماتيالىق قارىم- قاتىناستى نىعايتىپ، مادەني ىنتىماقتاستىقتى ودان ءارى جەتىلدىرۋ. سول سەبەپتى وسى باعىتتاعى مىندەتىمىزدى جالعاستىرا بەرەمىز. قازاق تىلىنە قىزىعۋشىلىقتىڭ ارتۋى قوس ەل اراسىنداعى دوستىق پەن مادەني بايلانىستىڭ نىعايىپ كەلە جاتقانىن كورسەتەدى. بۇل باستاما تۇركى حالىقتارىنىڭ ىنتىماقتاستىعىن دا كۇشەيتە تۇسپەك.

اۆتورى: ءاسيا نۇرلىبايەۆا

https://24.kz