تۇركيادا ماتراسىن جاقپاقشى بولعان ەر ادام ورماندى ورتەپ جىبەردى

استانا. KAZINFORM - وسى جىلدىڭ 22 -شىلدەسىندە تۇركيانىڭ ساكاريا پروۆينتسياسىنىڭ اكيازى اۋدانىندا ەر ادام ءوزىنىڭ ەسكى ماتراسىن جاقپاقشى بولىپ، ورماندى ورتەپ جىبەردى.

بۇل تۋرالى ەلدىڭ ىشكى ىستەر ءمينيسترى الي ەرليكايا x- تاعى پاراقشاسىندا جازدى.

ەرليكايا 22-27 -شىلدە ارالىعىندا بولعان ورمان ورتىنە بايلانىستى بارلىعى 7 كۇدىكتىنىڭ ۇستالعانىن، ولاردىڭ 3- ءىنىڭ تۇرمەدە ەكەنىن، 4- ءىنىڭ سوت باقىلاۋىمەن بوساتىلعانىن حابارلادى.

— 22 -شىلدەدە اكيازى اۋدانى بوزتەپە ىقشام اۋدانىندا باستالعان ورتكە ا. ب ەسىمدى ادام سەبەپشى بولعان. ەسكى ماتراسىن جاقپاقشى بولعان كەزدە ءورت ورمانعا تارالىپ كەتكەن. ا. ب. قاماۋعا الىندى، - دەدى ەرليكايا.

الاپات ءورت ەلدىڭ باسقا ايماقتارىندا دا ءورشىپ تۇر. قورشاعان ورتا جانە ۋربانيزاتسيا ءمينيسترى مۇرات كۋرۋمنىڭ ايتۋىنشا، وتكەن اپتادا انتاليا، بيلەدجيك، بۋرسا، كارابۇك، ساكاريا جانە ۋشاك پروۆينتسيالارىندا ورمان ورتىنەن 104 نىسان، ونىڭ ىشىندە 68 ءۇي قاتتى زاقىمدالعان نەمەسە قيراعان.

ەسكە سالا كەتەيىك، تۇركيا ورمان ورتىمەن كۇرەسىپ جاتىر.

اۆتور

بەگابات ۇزاقوۆ