تۇركيادا جالعان دوللار جاسايتىندار كوبەيىپ كەتتى

استانا. KAZINFORM - جالعان اقشا جاسايتىندار كوبىنەسە 50 جانە 100 دوللارلىق بانكنوتتاردى تاڭدايدى، دەپ حابارلايدى Kazinform اگەنتتىگىنىڭ ءتىلشىسى.

بەلگىلى بولعانداي، جالعان دوللار نەگىزىنەن تۇركياداعى ەڭ ءىرى جانە ەڭ كونە بازارلاردىڭ ءبىرى - قاپالى چارشىدا تارايدى. بۇل بازار ىستانبۇل قالاسىندا ورنالاسقان. وندا ساۋداگەرلەر مەن تۋريستەردىڭ اعىنى مول ەكەندىگىن بىلگەن ءار ءتۇرلى ەلدەن كەلگەن قىلمىسكەرلەر ساۋدا جاساعاندا جالعان دوللارلاردى پايدالانادى.

تۇركيا بانكتەر قاۋىمداستىعى ەلدىڭ ەكىنشى دەڭگەيلى بانكتەرىنە قاۋىپسىزدىك شارالارىن كۇشەيتۋدى قاتاڭ تۇردە ۇسىنىپ، رەسمي ەسكەرتۋ جولدادى. جەكە قارجى ينستيتۋتتارى ءوز قىزمەتكەرلەرىنە اسىرەسە 50 دوللارلىق بانكنوتتارمەن جۇمىس ىستەگەن كەزدە اسا ساق بولۋدى تاپسىردى.

قازىرگى زامانداعى جالعان اقشالاردىڭ ساپاسى وتە جوعارى بولعاندىقتان ونى ساناۋ ماشينالارى مەن ۋلتراكۇلگىندى ساۋلەلەر ارقىلى تەكسەرگەن كەزدە انىقتاي الماي قالۋ قاۋپى جوعارى. سوندىقتان بۇل ماسەلەنىڭ وزەكتىلىگى ارتىپ وتىر.

اۆتوريزاتسيالانعان ايىرباستاۋ پۋنكتتەرى قاۋىمداستىعىنىڭ ءتوراعاسى مۇستافا ۇنۆەر جالعان دوللاردىڭ باسىم بولىگى ازيا، تاياۋ شىعىس جانە بالقان ەلدەرىنەن كەلەتىنىن ايتتى.

«جالعان بانكنوتتاردىڭ تارالۋى ەلدىڭ قارجى جۇيەسىنە نۇقسان كەلتىرىپ، قولما- قول اقشا تولەمدەرىنە دەگەن سەنىمدى ازايتادى، - دەدى ول.