تۇركيادا ءىرى جول اپاتى بولدى: قازا تاپقاندار بار

استانا. KAZINFORM — وقيعا تۇركيانىڭ چاناككالە پروۆينتسياسىندا بولدى. Kazinform اگەنتتىگىنىڭ مەنشىكتى ءتىلشىسىنىڭ حابارلاۋىنشا، جولاۋشىلار اۆتوبۋسى، اعاش تيەگەن جۇك كولىگى جانە جەڭىل كولىك سوقتىعىسىپ، جول- كولىك وقيعاسى تىركەلدى.

وقيعا چاناككالە-ەزينە اۆتوجولىندا بولدى. الدىن الا مالىمەتتەر بويىنشا، وتىن تيەگەن جۇك كولىگى اۋدارىلىپ، قارسى جولاققا شىعىپ كەتكەن. سول جەردە ول جولاۋشىلار اۆتوبۋسى مەن جەڭىل كولىكپەن سوقتىعىسقان. اپات سالدارىنان 8 ادام قازا تاۋىپ، تاعى 20 ادام ءارتۇرلى دەڭگەيدە جاراقات العان.

وقيعا ورنىنا جەدەل تۇردە جەدەل جاردەم، ءورت سوندىرۋشىلەر، جاندارمەريا جانە پوليسيا قىزمەتكەرلەرى كەلىپ جەتتى.

چاناككالە پروۆينتسياسىنىڭ گۋبەرناتورى ومەر توراماننىڭ ايتۋىنشا، جۇك كولىگىنىڭ جۇرگىزۋشىسى وقيعا ورنىندا كوز جۇمعان. اۆتوبۋستا 25 ادام بولعان، سونىڭ ىشىندە ءۇش ەكيپاج مۇشەسى. بەس جولاۋشى وقيعا ورنىندا قازا بولعان، تاعى ۇشەۋى اۋرۋحانادا كوز جۇمدى. بىرنەشە ادامنىڭ جاعدايى اۋىر دەپ باعالانىپ وتىر.

تۇركيانىڭ ادىلەت ءمينيسترى يىلماز تۋنچ قازا تاپقانداردىڭ وتباسىنا كوڭىل ايتىپ، جارالانعاندارعا تەزىرەك ساۋىعىپ كەتۋىن تىلەدى. سونداي- اق ول بۇل ءىستىڭ مۇقيات تەرگەلەتىنىن ايتتى.

جول قوزعالىسى ۋاقىتشا توقتاتىلىپ، كەيىن بالاما باعىتتار ارقىلى قايتا اشىلدى. قايعىلى وقيعا بويىنشا ەزينە قالاسىنىڭ پروكۋراتۋراسى تەرگەۋ جۇرگىزىپ جاتىر. ەكى پروكۋرور وقيعانىڭ سەبەپتەرىن انىقتاۋمەن اينالىسىپ جاتىر.

ايتا كەتەيىك، تۇركيادا جول-كولىك وقيعالارىنان بولاتىن ءولىم- ءجىتىمدى ازايتۋ ماقساتىندا جازانى قاتايتۋ، قاۋىپسىزدىك ستاندارتتارىن ارتتىرۋ جانە جۇرگىزۋشىلەرگە ارنالعان ءبىلىم بەرۋ باعدارلامالارى قولعا الىنىپ جاتىر.

دەگەنمەن، تۇركيا جولدارىندا جولاۋشىلار اۆتوبۋستارى مەن جۇك كولىكتەرى قاتىسقان اپاتتار ءجيى كەزدەسەدى. وسىنداي وقيعالاردىڭ ءبىرى بۇعان دەيىن دەنيزلي پروۆينتسياسىنداعى سارايكەي قالاسىندا تىركەلگەن بولاتىن.