تۇركيادا ءتۇرلى ۇيىمداسقان قىلمىستىق توپتاردىڭ 157 مۇشەسى ۇستالدى
استانا. KAZINFORM - تۇركيادا ۇيىمداسقان قىلمىسپەن كۇرەس اياسىندا «دالتونلار» دەپ اتالاتىن قىلمىستىق توپ gty «بارىش بويۋن» بانداسىنا قارسى اۋقىمدى ارنايى وپەراتسيا جۇرگىزىلدى.
كۇش قۇرىلىمدارىنىڭ بۇل ارەكەتى ەلدىڭ ءار وڭىرىندە ۇزاق ۋاقىت بويى ارەكەت ەتىپ كەلگەن قىلمىسكەرلەردىڭ زاڭسىز ارەكەتتەرىنە توسقاۋىل قويۋعا باعىتتالعان.
تۇركيانىڭ ۋاكىلەتتى ورگاندارىنىڭ حابارلاۋىنشا، جينالعان اقپاراتتى تالداۋ نەگىزىندە ۇزاققا سوزىلعان جەدەل-ىزدەستىرۋ شارالارىنىڭ ناتيجەسىندە پوليتسيا ەلدىڭ ءارتۇرلى قالالارىندا «دالتونلار» قىلمىستىق ۇيىمى مەن «بارىش بويۋن» توپتارىنا قارسى رەيد جۇرگىزدى.
تۇرىك قاۋىپسىزدىك كۇشتەرىنىڭ ارەكەتى كەزىندە 157 ادام ۇستالدى، ولاردىڭ اراسىندا ۇيىمداسقان قىلمىستىق توپتىڭ قاتارداعى مۇشەلەرى دە، جەتەكشىلەرى دە بار. ۇستالعانداردان اتىس قارۋى، ەسىرتكى زاتتارى جانە ولاردىڭ قىلمىستىق ارەكەتتەرىن دالەلدەيتىن باسقا دا زاتتاي ايعاقتار تاركىلەندى.
«دالتونلار» ۇيىمداسقان قىلمىستىق توبىنىڭ اتاۋى تانىمال مۋلتفيلمنەن الىنعان، ءبىراق شىن مانىندە بۇل قاۋىپتى قىلمىستىق ۇيىم. ول ۇزاق جىلدار بويى زاڭسىز ارەكەتتەرگە بەلسەنە ارالاسقان. بۇل توپقا ەسىرتكى تاسىمالى، بوپسالاۋ، رەيدەرلىك شابۋىل، قوقان- لوققى جانە زاڭسىز قارۋ-جاراق ساۋداسى بويىنشا بىرنەشە ايىپ تاعىلعان. «دالتونلار» تۇركيانىڭ بىرنەشە ايماعىندا شوعىرلانعان.
باندا مۇشەلەرى قىلمىستىق جەلىلەردى باقىلاپ، قاتىگەز بانديتيزم ادىستەرىمەن زاڭسىز تابىس تابۋىمەن تانىمال. ۇيىم باسقا قىلمىستىق توپتارمەن دە بايلانىسىن ساقتاپ، قوعامعا ۇلكەن قاۋىپ ءتوندىردى.
بارىش بويۋن تۇرىك قىلمىستىق الەمىنىڭ تانىمال كوشباسشىلارىنىڭ ءبىرى. ونىڭ باسشىلىعىمەن قىلمىستىق توپ زورلىق-زومبىلىق، كونتراباندا جانە باسقا دا زاڭسىز ارەكەتتەرمەن اينالىسىپ، ءوز قىزمەتىن نەگىزىنەن ىستانبۇل جانە ونىڭ ماڭايىندا شوعىرلاندىرعان. بارىش بويۋن توبى جاقسى ۇيىمداسقان جانە قاتىگەزدىكتىڭ كەز كەلگەن تۇرىنە بارا بەرەتىن ۇيىم. ول تۇرىك پوليتسياسىنىڭ نەگىزگى جانە قاۋىپتى نىساناسىنا اينالدى.
ۇستالعاننان كەيىن بارلىق كۇدىكتىلەرگە ۇيىمداسقان قىلمىستىق توپقا قاتىسۋ، ونىڭ ىشىندە ەسىرتكى ساۋداسى، بوپسالاۋ جانە باسقا دا ءبىرقاتار قىلمىس بويىنشا ايىپ تاعىلدى. جاقىن ارادا بارلىق ايىپتالۋشىلار سوت الدىنا شىعادى.
بۇعان دەيىن تۇرىك كيبەرپوليتسياسى الەۋمەتتىك جەلىلەردە 5 مىڭنان استام قىلمىستىق كونتەنتتى انىقتاعان بولاتىن.
وسىعان دەيىن تۇركيانىڭ «ورتالىق ازيا» تەرمينىن تاريحي «تۇركىستان» اتاۋىنا اۋىستىرۋدى كوزدەپ وتىرعانىن جازدىق.