تۇركيادا ا ە س سالۋعا مىڭنان استام قازاقستاندىق اتسالىسىپ جاتىر

استانا. قازاقپارات - تۇركيادا اتوم ەلەكتر ستانسياسىن سالۋعا مىڭنان استام قازاقستاندىق اتسالىسىپ جاتىر، دەپ حابارلايدى 24kz.

قازىر ەلىمىزدىڭ ماماندارى حالىقارالىق تاجىريبەنى جان-جاقتى زەردەلەۋدە. الەمدىك دەڭگەيدەگى جوباعا قاتىسىپ جاتقان وتانداستارىمىزبەن ءتىلشىمىز كەزدەسىپ قايتتى.

تۇركيانىڭ مەرسين ايماعىنداعى «اككۋيۋ» اتوم ەلەكتر ستانسياسىنىڭ قۇرىلىسى - الەمدەگى ەڭ ءىرى يادرولىق جوبالاردىڭ ءبىرى. بۇل جۇمىسقا 34 مىڭ ادام تارتىلعان. ولاردىڭ ىشىندە مىڭنان استام وتانداسىمىز بار. باسشىلىق قىزمەت اتقاراتىندار دا كەزدەسەدى. ماسەلەن نازىگىم ىسقاقوۆا قۇرىلىستى قاداعالاۋ قۇجاتتارىنا جاۋاپتى.

نازىگىم ونەركاسىپتىك جانە ازاماتتىق قۇرىلىس ماماندىعىن الماتىدا وقىعان. تۇركياعا جاڭا مۇمكىندىك ىزدەپ، حالىقارالىق كومپانيادا تاجىريبە جيناۋ ءۇشىن كەلگەن. ءبىراق بولاشاقتا قازاقستاننىڭ اتوم سالاسىن دامىتۋعا ءوز ۇلەسىن قوسقىسى كەلەدى.

نازىگىم ىسقاقوۆا، «اككۋيۋ نۋكلەار» اق قۇرىلىس باقىلاۋ ءبولىمىنىڭ اتقارۋشى قۇجاتتاما توبى باعىتىنىڭ باسشىسى:

- مەن ءبىر جارىم جىل باس مامان بولدىم. باستىقتارىم ەڭبەگىمدى باعالاپ، ساراپشى قىزمەتىنە تاعايىندادى. تاعى ءبىر جىلدان كەيىن سالا باسشىسى دەڭگەيىنە كوتەرىلدىم. قازاقستاننىڭ دامۋى، ونىڭ ىشىندە مەديتسينا بولسىن، ءبىلىم بولسىن، بارلىق سالا العا باسۋى ءۇشىن ەنەرگيا كەرەك. كوپ قۋات ءوندىرىپ قانا قويماي، تابيعاتىمىزدى ساقتاپ قالۋ ماڭىزدى. ءدال وسى اتوم ەنەرگەتيكاسى كومىرقىشقىل جانە پارنيك گازىنىڭ شىعىندىلارىن ازايتۋعا كومەكتەسەدى. تۇركياداعى جوبادان جيناعان تاجىريبەمدى قازاقستانداعى اتوم سالاسىن دامىتۋعا جۇمسايمىن.

جاقىندا نازىگىم «روس اتومنىڭ جىل ادامى» اتاندى. بۇل اتاق كورپوراتسياداعى مىڭداعان قىزمەتكەردىڭ ىشىندەگى ۇزدىكتەرگە عانا بەرىلەدى. قازاقستاندا اتوم سالاسىن دامىتۋدى ولاردىڭ ارىپتەسى مادينا ءابىلدينوۆا دا ارماندايدى. ول وسى جوبا ءۇشىن قاراعاندىدان وتباسىمەن كوشىپ كەلگەن. بوكەتوۆ اتىنداعى ۋنيۆەرسيتەتتىڭ تۇلەگى بۇگىندە حيميالىق ساراپتامامەن اينالىسادى.

مادينا ءابىلدينوۆا، «اككۋيۋ نۋكلەار» ا ق گاز- ماي توبىنىڭ حيميالىق تالداۋ زەرتحاناشىسى:

- ءبىز 2021 -جىلى جۇمىس ىستەۋگە كەلدىك. «اككۋيۋ» جوباسى بىزگە شەكسىز مۇمكىندىك بەرىپ وتىر. مۇندا وراسان زور تاجىريبە جينادىم. جوبا اياقتالعان سوڭ بار بىلگەنىمدى وتانداستارىما ۇيرەتكىم كەلەدى.

قازاقستاندىقتار تۋعان توپىراقتان الىستا جاڭا داعدىلار مەڭگەرىپ جاتىر. ولار حالىقارالىق كومپانيادا ءجۇرىپ ءتۇرلى قيىندىقتاردى ەڭسەرىپ، كۇردەلى تاپسىرمالاردى ورىنداۋدى ۇيرەندى. وتانداستارىمىز قازاقستاننىڭ اتوم قۋاتىن باعىندىرۋدا ۇلكەن مۇمكىندىگى بار ەكەنىن ايتادى. سوندىقتان ەلگە كەلە سالا وسى ماڭىزدى سالانى دامىتۋعا ۇلەسىن قوسۋعا نيەتتى.

24.kz