تۇركيا يزرايلمەن بارلىق ساۋدا-ساتتىقتى توقتاتتى

استانا. KAZINFORM - ءساۋىر ايىندا تۇركيانىڭ ساۋدا مينيسترلىگى گازا سەكتورىندا اتىستى توقتاتۋدى جانە ايماققا گۋمانيتارلىق كومەكتىڭ كەدەرگىسىز اعىنىن قامتاماسىز ەتۋدى تالاپ ەتىپ، يزرايلگە 54 ساناتتاعى تاۋار ەكسپورتىنا شەكتەۋ قويدى، دەپ حابارلايدى DW اقپارات اگەنتتىگى.

تۇركيا يزرايل ارمياسىنىڭ گازا سەكتورىنداعى اسكەري وپەراتسياسىنا بايلانىستى يزرايلدەن تاۋار يمپورتتاۋ جانە ەكسپورتتاۋدى تولىعىمەن توقتاتتى. بۇل تۋرالى 2-مامىر، بەيسەنبى كۇنى ەسىمدەرى اتالماعان ەكى تۇرىك شەنەۋنىگىنە سىلتەمە جاساعان Bloomberg اگەنتتىگى حابارلادى. يزرايل سىرتقى ىستەر ءمينيسترى يسراەل كاتس انكارامەن ساۋدا-ساتتىقتى توقتاتۋ تۋرالى اقپاراتتى راستادى.

كاتس X الەۋمەتتىك جەلىسىندە تۇركيانىڭ بۇل شەشىمى - تۇرىك حالقى مەن بيزنەس وكىلدەرىنىڭ مۇددەلەرىن ەلەمەۋ، حالىقارالىق ساۋدا كەلىسىمدەرىن ەلەمەۋ دەپ جازدى. ونىڭ ايتۋىنشا، يزرايل تۇركيامەن ساۋدا-ساتتىققا دەرەۋ بالاما جاساپ، جاڭا جەتكىزۋشىلەر تاۋىپ، جەرگىلىكتى ءوندىرىستى ۇلعايتۋعا كىرىسپەك.

بۇعان دەيىن تۇركيانىڭ ساۋدا مينيسترلىگى گازا سەكتورىندا اتىستى توقتاتقانعا دەيىن جانە ايماققا گۋمانيتارلىق كومەكتىڭ جەتكىلىكتى كولەمىن كەدەرگىسىز جەتكىزۋدى قامتاماسىز ەتپەيىنشە، يزرايلگە ەكسپورتتى شەكتەيتىنىن مالىمدەگەن. شەكتەۋ 9-ساۋىردە كۇشىنە ەنىپ، تاۋارلاردىڭ 54 ساناتىنا قاتىستى بولدى، سونىڭ ىشىندە بولات، كەروسين، تىڭايتقىشتار، قۇرىلىس جابدىقتارى جانە كولىكتەر بار.

تۇركيا ستاتيستيكا ينستيتۋتىنىڭ مالىمەتىنشە، تۇركيا مەن يزرايل اراسىنداعى تاۋار اينالىمى 2023-جىلى 6,8 ميلليارد دوللاردى قۇرادى. ونىڭ 76 پايىزى تۇرىك ەكسپورتىنا تيەسىلى.