تۇركيا «ورتالىق ازيا» تەرمينىن تاريحي «تۇركىستان» اتاۋىنا اۋىستىرماقشى

استانا. KAZINFORM - تۇركيانىڭ ۇلتتىق ءبىلىم مينيسترلىگى تاريح ءپانىنىڭ جاڭا باعدارلاماسىنا تۇبەگەيلى وزگەرىستەر ەنگىزدى. اتاپ ايتقاندا، «ورتالىق ازيا» تەرمينى «تۇركىستان» دەگەن سوزبەن اۋىستىرىلادى.

پرەزيدەنت رەجەپ تايىپ ەردوعان «تۇرىك عاسىرى» باعدارلاماسى اياسىندا تۇركى الەمىنىڭ جاڭا جاھاندىق دەرجاۆا بولۋ نيەتىمەن تۇركيامەن بىرگە «تۇركى ءداۋىرىن» جالعاستىرۋ نيەتىن جاريالادى.

تۇركيا باسشىسى بىرلىكتىڭ ماڭىزدىلىعىنا توقتالىپ، تۇركى حالىقتارى گەوساياسي سىن-قاتەرلەرگە توتەپ بەرىپ، بەرىك بولۋى كەرەكتىگىن ايتتى.

تۇركيانىڭ ءبىلىم مينيسترلىگى بۇل كوزقاراستى 2024-2025 وقۋ جىلىنا ارنالعان جاڭا ءبىلىم بەرۋ باعدارلاماسى - «تۇركيا عاسىرىنىڭ ءبىلىم بەرۋ مودەلى» ارقىلى قولدايدى.

جاڭا باعدارلاما اياسىندا، اسىرەسە، تاريح ءپانىن وقىتۋعا ەلەۋلى وزگەرىستەر ەنگىزىلدى. مىسالى، «ورتالىق ازيا» تەرمينى تاريحي ناقتى «تۇركىستان» ۇعىمىمەن اۋىستىرىلدى.

تۇركيا ءبىلىم مينيسترلىگى ماماندارىنىڭ ايتۋىنشا، بولاشاق ۇرپاق تۇركى بولمىسىن، ۇلتتىق سانا-سەزىمى مەن وتان سۇيگىشتىك سەزىمىمەن تاربيەلەنەدى.

تۇرىك ساراپشىلارىنىڭ پىكىرىنشە، «تۇركىستان» تەرمينى ەجەلگى زاماننان بەرى تۇرىكتەر قونىستانعان جەرلەرگە قاتىستى قولدانىلعان جانە ونىڭ ءبىلىم بەرۋ باعدارلامالارىنا ورالۋى تاريحي ادىلەتتىلىكتى قالپىنا كەلتىرۋگە جانە تۇركى الەمىنىڭ بىرلىگىن نىعايتۋعا باعىتتالعان ماڭىزدى قادام.

وسىلايشا، تۇركيانىڭ ءبىلىم مينيسترلىگى ۇلى تۇركىستان مۇراسىن ساقتاۋ جاۋاپكەرشىلىگىن ءوز موينىنا الدى.

اۆتور

ەركەجان سماعۇلوۆا