تۇركيا تورىندەگى قازاق ساياباعى - دوستىقتىڭ ناقتى كورىنىسى

استانا.قازاقپارات - ەل تاۋەلسىزدىگىنىڭ 35 جىلىندا قازاقستان مەن تۇركيا اراسىنداعى دوستىق نىعايىپ، ستراتەگيالىق ارىپتەستىك تەرەڭدەي ءتۇستى.

Фото: Мемлекеттік органдар Нашар көретіндерге арналған сайт нұсқасына көшу kk Авторизация Қазақстан Республикасының Түркия Республикасындағы Елшілігі

كەيىنگى جىلدارى ەكى ەلدە دە قوس حالىقتىڭ تاريحي ساباقتاستىعى مەن رۋحاني جاقىندىعىن ايقىندايتىن ماڭىزدى ورىندار اشىلىپ جاتىر. انكارادا قازاقتىڭ ۇلتتىق بولمىسىن دارىپتەيتىن مادەني نىساندار كوپتەپ بوي كوتەرگەن. سونىڭ ءبىر دالەلى - وسىدان تۋرا 3 جىل بۇرىن اشىلعان تۇركيا-قازاقستان دوستىق ساياباعى.

ءاسيا نۇرلىبايەۆا، ءتىلشى:

- تاۋەلسىزدىكتىڭ 35 جىلىندا قازاقستان مەن تۇركيا اراسىنداعى بايلانىس باۋىرلاستىق دەڭگەيىنەن ستراتەگيالىق ارىپتەستىك بيىگىنە كوتەرىلدى. ساياسي ديالوگ نىعايىپ، ساۋدا-ەكونوميكالىق، مادەني-گۋمانيتارلىق ىنتىماقتاستىق اياسى كەڭەيدى. بۇل جاقىندىقتى سوزبەن عانا ەمەس، ناقتى ىسپەن كورسەتىپ كەلە جاتقان تۇركيا قازاق حالقىنىڭ تاريحي تۇلعالارى مەن رۋحاني مۇراسىنا ايرىقشا قۇرمەت تانىتىپ وتىر.

سونىڭ ءبىر دالەلى - انكارانىڭ ماماك اۋدانىنداعى تۇركيا-قازاقستان دوستىق ساياباعى. بۇل - قوس حالىقتىڭ ورتاق تاريحىن ۇلىقتاپ، ۇرپاقتار ساباقتاستىعىن جالعاعان ەرەكشە رۋحاني مەكەن. مۇندا ابايدىڭ اسىل مۇراسى مەن كونە تۇركى داۋىرىنەن جەتكەن جادىگەرلەر توعىسقان. قازاق جەرىنەن مىڭداعان شاقىرىم قاشىقتىقتا ورنالاسقانىمەن، بۇل ورىننان ۇلتىمىزدىڭ بولمىسىن، تۇركى جۇرتىنا ورتاق تاريحىمىزدى تانۋعا بولادى. ءدال قازىر مەنىڭ جانىمدا وسى ساياباق ورنالاسقان ماماك اۋداندىق اكىمدىگىنىڭ وكىلى بيرول تەمۋر تۇر.

- بيرول مىرزا، سالەمەتسىز بە! بۇل ساياباق - قازاقستان مەن تۇركيا اراسىنداعى دوستىقتىڭ ناقتى كورىنىسى. ونىڭ بوي كوتەرۋىنە قانداي باستاما تۇرتكى بولدى؟ ساياباقتى سالۋداعى باستى ماقسات قانداي ەدى؟

بيرول تەمۋر، ماماك اكىمدىگىنىڭ وكىلى:

- بۇل ساياباقتىڭ جوباسى 2023-جىلى سول كەزدەگى ماماك مۋنيتسيپاليتەتىنىڭ اكىمى مۇرات كوسەنىڭ باستاماسىمەن قولعا الىندى. قازاقستاننىڭ مادەنيەتى مەن تاريحىن تۇركيا جۇرتشىلىعىنا تانىستىرۋ، ەكى باۋىرلاس حالىقتىڭ بايلانىسىن نىعايتۋ ماقساتىندا جۇزەگە اسىرىلدى. سول جىلى پايدالانۋعا بەرىلدى. ال اشىلۋ راسىمىنە سول كەزدەگى پروۆينتسيا باسشىلىعى، قازاقستاننىڭ تۇركياداعى ەلشىلىگى، سونداي-اق قازاقستان پارلامەنتى سەناتىنىڭ ءتوراعاسى دا قاتىستى. قازىر بۇل ساياباق جەرگىلىكتى تۇرعىندار عانا ەمەس، قازاقستاندىقتاردىڭ بىرگە ۋاقىت وتكىزەتىن الاڭىنا اينالدى.

ساياباقتىڭ جالپى اۋماعى 13 مىڭ 896 شارشى مەتر. مۇندا تۇرعىنداردىڭ دەمالۋىنا، سپورتپەن شۇعىلدانىپ، سەرۋەندەۋىنە جاعداي جاسالعان. الايدا ساياباقتىڭ باستى قۇندىلىعى ونىڭ تاريحي-مادەني مازمۇنىندا. اۋماعىندا قازاقتىڭ ۇلى ويشىلى اباي قۇنانباي ۇلىنىڭ بيۋستى بوي كوتەرگەن. سونىمەن قاتار تۇركى وركەنيەتىنىڭ باعا جەتپەس مۇراسى كۇلتەگىن، بىلگە قاعان مەن تونىكوك جازبالارىنىڭ ەسكەرتكىشتەرى قويىلعان. دەمەك، بۇل جەر جاي عانا دەمالىس ورنى ەمەس، تاريحي جادىنى جاڭعىرتىپ، مادەني بايلانىستى بەكەمدەيتىن ماڭىزدى الاڭ.

ءاسيا نۇرلىبايەۆا، ءتىلشى:

- الىستاعى اعايىننىڭ قازاقتىڭ ۇلى تۇلعالارىن ۇلىقتاپ، رۋحاني مۇراسىن تورگە وزدىرۋى ەلگە كورسەتىلگەن قۇرمەتتىڭ بەلگىسى. ويتكەنى ەلدەر اراسىنداعى دوستىق ساياسي كەلىسىممەن عانا ولشەنبەيدى. ول ورتاق تاريحتى قادىرلەۋ، مادەنيەتتى قۇرمەتتەۋ مەن كەلەر ۇرپاققا ورتاق قۇندىلىقتى اماناتتاۋ ارقىلى نىعايادى. تاۋەلسىزدىكتىڭ 35 جىلدىعى قارساڭىندا مۇنداي رۋحاني بايلانىستىڭ ءمانى ءتىپتى ارتا تۇسەدى. سەبەبى قازاقتىڭ تاريحى مەن مادەنيەتىنىڭ ءوز توپىراعىندا عانا ەمەس، شەتەلدەگى باۋىرلاس جۇرتتىڭ دا جادىندا جاڭعىرۋى - ەلىمىزدىڭ مەرەيى.

اۆتورى: ءاسيا نۇرلىبايەۆا

https://24.kz