تۇركيا تۇرمەلەرىندە ادام سانى شەكتى دەڭگەيدەن اسىپ كەتتى

استانا. KAZINFORM - تۇركيانىڭ تۇرمە جۇيەسى بۇرىن-سوڭدى بولماعان شامادان تىس جۇكتەمەگە تاپ بولدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ەلدەگى تۇرمەلەر باس باسقارماسىنىڭ مالىمەتىنشە، بيىل ماۋسىم ايىنىڭ باسىنداعى جاعداي بويىنشا ەلدەگى جالپى سوتتالعاندار سانى 416927 ادامعا جەتكەن. بۇل كورسەتكىش تۇركيانىڭ 34 پروۆينتسياسىنداعى حالىق سانىنان كوپ ءارى تۇرمەلەردىڭ 295000 ادامعا ەسەپتەلگەن رەسمي سىيىمدىلىعىنان ايتارلىقتاي اسىپ تۇسەدى.

جالپى سوتتالعانداردىڭ ىشىندە 359227 ادام - ۇكىم شىققان جازاسىن وتەۋشىلەر، ال 57700 ادام - تەرگەۋ يزولياتورىندا، سوت شەشىمىن كۇتىپ وتىر. سوڭعى ەكى ايدا قاماۋعا الىنعاندار سانى 13867 ادامعا ارتقان. بۇل تۇركيانىڭ پەنيتەنتسيارلىق جۇيەسىنە تۇسەتىن جۇكتەمەنىڭ كۇرت وسكەنىن كورسەتەدى.

تۇركيادا تۇرمەلەر بەلگىلەنگەن سىيىمدىلىقتان 121 مىڭ ادامعا اسىپ كەتكەنى ەرەكشە الاڭداۋشىلىق تۋعىزىپ جاتىر. بۇل جاعداي قاماۋداعىلاردىڭ ءومىر ءسۇرۋ جاعدايىنا، قاۋىپسىزدىككە جانە ادام قۇقىقتارىنىڭ ساقتالۋىنا ەلەۋلى قاۋىپ توندىرەدى.

قازىرگى تاڭدا تۇرمەلەردە 18727 ايەل وتىر. بۇل دەرەك تە قوعام نازارىن اۋدارۋدا، سەبەبى ايەلدەردى ۇستاۋعا ارنالعان جاعدايلار مەن ينفراقۇرىلىم ءالى دە جەتىلدىرۋدى قاجەت ەتەدى.

ساراپشىلاردىڭ پىكىرىنشە، قىلمىستىق ساياساتتى قايتا قاراپ، شارتتى جازا، تۇزەتۋ جۇمىستارى جانە وڭالتۋ باعدارلامالارى سياقتى بالاما جازالاۋ شارالارىنا نازار اۋدارۋ قاجەت.