تۇركيا پرەزيدەنتى ساياساتتان كەتۋى مۇمكىن ەكەنىن مەڭزەدى

استانا. KAZINFORM - ەردوعان 31-ناۋرىزدا وتەتىن مۋنيتسيپالدى سايلاۋ ءوزى ءۇشىن سوڭعى سايلاۋ بولۋى مۇمكىن ەكەنىن ايتتى. ساياساتكەر 2028-جىلى پرەزيدەنتتىكتەن كەتكەننەن كەيىن ا ك پ- نىڭ كونسەرۆاتورلارى بيلىكتە قالا بەرەتىنىنە سەنىم ءبىلدىردى، دەپ حابارلادى DW.

تۇركيادا ناۋرىز ايىنىڭ سوڭىندا وتەتىن مۋنيتسيپالدى سايلاۋ ەلدىڭ قازىرگى پرەزيدەنتى رەجەپ تايىپ ەردوعان ءۇشىن سوڭعىسى بولماق. بۇل تۋرالى مەملەكەت باسشىسى جۇما كۇنى، 8-ناۋرىزدا TUGVA جاستار ۇيىمىنىڭ وتىرىسىندا مالىمدەدى. ەردوعان زاڭناما بويىنشا وزىنە بەرىلگەن وكىلەتتىكتەرگە توقتالدى.

سونىمەن بىرگە، 70 جاستاعى ساياساتكەر ءوزى جەتەكشىلىك ەتەتىن كونسەرۆاتيۆتى ادىلەت جانە دامۋ پارتياسى ەردوعان مەملەكەت باسشىسى قىزمەتىنەن كەتكەننەن كەيىن دە بيلىكتە قالاتىنىنا سەنىم ءبىلدىردى.

رەجەپ تايىپ ەردوعان 20 جىلدان استام ۋاقىت بيلىكتە بولدى. 2003-جىلى ول العاش رەت پرەمەر-مينيستر، 2014 -جىلى پرەزيدەنت بولىپ سايلاندى.

2018 -جىلى ەردوعان جوعارى مەملەكەتتىك لاۋازىمعا قايتا سايلاندى. 2023 -جىلى ول پرەزيدەنتتىك سايلاۋدا قايتادان جەڭىسكە جەتتى، ءبىراق تەك ەكىنشى تۋردا وپپوزيتسيانىڭ جالعىز كانديداتى كەمال كىلىچداروگلۋدى جەڭدى. قازىرگى مەملەكەت باسشىسىنىڭ وكىلەتتىگى 2028-جىلى اياقتالادى.

اۆتور

ەركەجان سماعۇلوۆا