تۇركيانىڭ ۆيتسە-پرەزيدەنتى دجيەۆدەت يىلماز 2027 -جىلعى مەملەكەتتىك بيۋدجەت جوباسىندا قارۋ-جاراق، وق-ءدارى جانە اسكەري تەحنيكا ساتىپ الۋعا جۇمسالاتىن قارجى كولەمى ەداۋىر كوبەيەتىنىن ايتتى.
ونىڭ سوزىنشە، 2027 -جىلى قارۋ-جاراق، وق-ءدارى، قارۋ جۇيەلەرى مەن وزگە دە قورعانىس جابدىقتارىن ساتىپ الۋعا بولىنەتىن قارجى 229 پايىز ارتادى. قورعانىس سالاسىنا 2,206 تريلليون تۇرىك ليراسى (شامامەن 44,5 ميلليارد دوللار)، ال ىشكى قاۋىپسىزدىككە 25,2 ميلليارد دوللار ءبولۋ جوسپارلانعان. ايتا كەتەيىك، 229 پايىزدىق ءوسىم جالپى قورعانىس بيۋدجەتىنە ەمەس، قارۋ-جاراق پەن اسكەري تەحنيكا ساتىپ الۋعا ارنالعان قاراجاتقا قاتىستى.
ۆيتسە-پرەزيدەنتتىڭ مالىمدەۋىنشە، سوڭعى 25 جىلدا تۇركيا قورعانىس ونەركاسىبىنىڭ شەتەلدىك جەتكىزۋشىلەرگە تاۋەلدىلىگىن ايتارلىقتاي ازايتقان. ونىڭ ايتۋىنشا، حالىقارالىق احۋالدىڭ قۇبىلۋى وتاندىق قارۋ-جاراق ءوندىرىسىن دامىتۋدىڭ ماڭىزىن ارتتىرىپ وتىر.
تۇركيا پرەزيدەنتى رەجەپ تاييپ ەردوعاننىڭ ايتۋىنشا، 2025 -جىلى ەل 180 ەل مەن ايماققا 10 ميلليارد دوللاردان استام سوماعا قورعانىس جانە ايەروعارىش ونىمدەرىن ەكسپورتتاعان. ىستانبۇلدا وتكەن «تۇركيانىڭ يننوۆاتسيالار اپتالىعى - 2026» ءىس-شاراسىندا ول عىلىمي زەرتتەۋلەردى، تەحنولوگيالىق ستارتاپتاردى جانە قوسىلعان قۇنى جوعارى ءونىم ءوندىرىسىن دامىتۋ ماڭىزدى ەكەنىن اتاپ ءوتتى.
تۇركيا 2030 -جىلعا دەيىن جالپى قۇنى 100 ميلليارد دوللارعا باعالاناتىن 100 مىڭ تەحنولوگيالىق ستارتاپ قۇرۋدى جوسپارلاپ وتىر. بۇل باعىتتاعى نەگىزگى جوبالاردىڭ ءبىرى - ىستانبۇلداعى اتاتۇرىك اۋەجايىنىڭ تەرمينالدارى نەگىزىندە «Terminal Istanbul» اتتى ءىرى تەحنولوگيالار جانە كاسىپكەرلىك ورتالىعىن اشۋ.
بيۋدجەت جوباسىندا قورعانىس پەن تەحنولوگيالىق دامۋدان بولەك، ينۆەستيتسيالارعا 57,5 ميلليارد دوللار، ءبىلىم بەرۋ سالاسىنا 75,6 ميلليارد دوللار، سونداي-اق جەر سىلكىنىسىنىڭ زارداپتارىن جويۋ مەن تابيعي اپاتتارعا توزىمدىلىكتى ارتتىرۋعا 17,5 ميلليارد دوللار ءبولۋ كوزدەلگەن. قۇجات پارلامەنتتىڭ قاراۋىنا جىبەرىلىپ، ونىڭ نەگىزگى كورسەتكىشتەرى بيۋدجەت جانە جوسپارلاۋ كوميتەتىندە قوسىمشا تالقىلانادى.
بۇعان دەيىن تۇركيا قورعانىس كورمەسىنەن تۇسكەن تابىستى درون ورتالىقتارىن دامىتۋعا جۇمسايتىنىن حابارلاعان بولاتىنبىز.