دەنساۋلىق ساقتاۋ مينيسترلىگىنىڭ باسپا ءسوز قىزمەتى ءمالىم ەتكەندەي، قۇجات مەديتسينالىق ينفراقۇرىلىمدى دامىتۋ، فارماتسيەۆتيكالىق ءوندىرىس، دەنساۋلىق ساقتاۋ سالاسىن سيفرلاندىرۋ، مەديتسينالىق عىلىمدى دامىتۋ، كادرلار دايارلاۋ جانە العاشقى مەديتسينالىق-سانيتاريالىق كومەكتى جەتىلدىرۋ سياقتى نەگىزگى باعىتتاردى قامتيدى.
- قول قويىلعان جوسپاردى قول جەتكىزىلگەن ۋاعدالاستىقتاردى ىسكە اسىرۋدىڭ ناقتى تەتىگى رەتىندە قاراستىرامىز. ءبىزدىڭ مىندەتىمىز - ناقتى ءىس-شارالاردى ايقىنداپ، جاۋاپتى ۇيىمداردى بەلگىلەپ، ولاردىڭ جۇيەلى تۇردە ورىندالۋىن قامتاماسىز ەتۋ،-دەپ اتاپ ءوتتى اقمارال ءالنازاروۆا.
كەزدەسۋ بارىسىندا ۆەدومستۆو باسشىسى تۇرىك كومپانيالارىنىڭ قازاقستانداعى مەديتسينالىق ينفراقۇرىلىمدى دامىتۋعا قوسىپ وتىرعان ۇلەسىنە توقتالدى. اتاپ ايتقاندا، Rِnesans Holding كومپانياسى كوكشەتاۋ قالاسىندا 630 توسەكتىك كوپبەيىندى اۋرۋحانانىڭ قۇرىلىسىن جۇرگىزىپ جاتىر. ال YDA Group تۇركىستان جانە پەتروپاۆل قالالارىنداعى اۋرۋحانالاردىڭ قۇرىلىسىنا قاتىسۋدا.
Orhun Medical كومپانياسىمەن يادرولىق مەديتسينا مەن دياگنوستيكالىق ينفراقۇرىلىمدى دامىتۋ بويىنشا ينۆەستيتسيالىق كەلىسىم جاسالدى. قازىر ماڭعىستاۋ جانە قىزىلوردا وبلىستارىندا پەت/كت ورتالىقتارى جۇمىس ىستەپ تۇر.
Abdi İbrahim جانە Nobel İlaç كومپانيالارىمەن دارىلىك زاتتار مەن بەلسەندى فارماتسيەۆتيكالىق ينگرەديەنتتەر ءوندىرىسىن قۇرۋدى كوزدەيتىن ەكى ءىرى ينۆەستيتسيالىق كەلىسىمگە قول قويىلدى.
بۇدان بولەك، ەكى ەلدىڭ رەتتەۋشى ورگاندارى اراسىندا فارماتسيەۆتيكالىق ينسپەكتسيا، زەرتحانالىق سىناقتار جانە فارماكولوگيالىق قاداعالاۋ باعىتتارىنداعى ىنتىماقتاستىقتى كەڭەيتۋ جوسپارلانىپ وتىر.
قازاقستان تاراپى تۇركيانىڭ اۋرۋحانالاردى سيفرلىق باسقارۋ تاجىريبەسىن، ونىڭ ىشىندە e-Nabiz پلاتفورماسىن ەنگىزۋگە، كلينيكالىق جانە اكىمشىلىك پروتسەستەردى اۆتوماتتاندىرۋعا، رەسۋرستار مەن پاتسيەنتتەر اعىنىن باسقارۋعا قىزىعۋشىلىق تانىتتى.
كادرلاردىڭ بىلىكتىلىگىن ارتتىرۋ باعىتىندا تاراپتار بىرلەسكەن عىلىمي زەرتتەۋلەر جۇرگىزۋ، تاعىلىمدامالار ۇيىمداستىرۋ، كلينيكالىق تاجىريبە الماسۋ جانە تۇركيانىڭ دەنساۋلىق ساقتاۋ ينستيتۋتتارىمەن (TـSEB) ىنتىماقتاستىق ورناتۋ ماسەلەلەرىن قاراستىردى. سونداي-اق مەديتسينالىق كادرلاردى اككرەديتتەۋ مەن سەرتيفيكاتتاۋ بويىنشا تۇرىك تاجىريبەسىن زەردەلەۋ كوزدەلگەن.
كەزدەسۋ بارىسىندا قازاقستاندا جەتەكشى تۇرىك ماماندارىنىڭ قاتىسۋىمەن، كارديولوگيا، نەيروحيرۋرگيا، وڭالتۋ جانە شۇعىل مەديتسينا باعىتتارى بويىنشا شەبەرلىك ساعاتتارى مەن پاتسيەنتتەرگە كونسۋلتاتسيالار ۇيىمداستىراتىن «تۇرىك مەديتسيناسى كۇندەرىن» وتكىزۋ ۇسىنىلدى.
ىنتىماقتاستىقتىڭ تاعى ءبىر باعىتى — مەديتسينالىق-سانيتاريالىق العاشقى كومەكتى دامىتۋ، اۋرۋلاردىڭ الدىن الۋ جانە مەديتسينالىق قىزمەتتەردىڭ قولجەتىمدىلىگىن ارتتىرۋ بويىنشا تاجىريبە الماسۋ.
- قازاقستان مەديتسينالىق قىزمەتتەردىڭ قولجەتىمدىلىگىن كەڭەيتۋگە، اۋرۋلاردىڭ الدىن الۋعا جانە دەنساۋلىق ساقتاۋ جۇيەلەرىنىڭ تۇراقتىلىعىن نىعايتۋعا باعىتتالعان العاشقى مەديتسينالىق-سانيتاريالىق كومەك جونىندەگى ەلدەردىڭ جاھاندىق كواليتسياسىن ىلگەرىلەتۋ جۇمىستارىن جالعاستىرۋدا. وسىعان بايلانىستى تۇركيا رەسپۋبليكاسىن كواليتسياعا قوسىلۋ مۇمكىندىگىن قاراستىرۋعا تاعى دا شاقىرامىن،-دەدى قازاقستاننىڭ دەنساۋلىق ساقتاۋ ءمينيسترى.
كەزدەسۋ قورىتىندىسى بويىنشا تاراپتار جاۋاپتى ۇيىمداردى ايقىنداپ، 2027-2028 -جىلدارعا ارنالعان ىنتىماقتاستىق جوسپارىنىڭ ءىس-شارالارىن جاقىن ارادا پراكتيكالىق ىسكە اسىرۋعا كىرىسۋگە ۋاعدالاستى.
وسىدان بۇرىن تۇركيا ب ۇ ۇ-نىڭ COP31 كليماتتىق كونفەرەنتسياسىن العاش رەت وتكىزىپ وتىرعانىن جازدىق.