نەگىزگى مەملەكەتتىك ءراسىم انكاراداعى انىتكابير كەسەنەسىندە ءوتتى.
سالتاناتتى شارا ساعات 08:45- تە مەملەكەتتىك ورگاندار وكىلدەرىنىڭ اتاتۇرىك كەسەنەسىنە اپاراتىن «ارىستاندار اللەياسى» بويىنداعى شەرۋىنەن باستالدى.
راسىمگە تۇركيا پرەزيدەنتى رەجەپ تايپ ەردوعان جەتەكشىلىك ەتتى. وعان تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋش، ەلدىڭ ۆيتسە-پرەزيدەنتى دجيەۆدەت يىلماز، ساياسي پارتيالاردىڭ جەتەكشىلەرى، ۇكىمەت مۇشەلەرى، سوت بيلىگىنىڭ وكىلدەرى مەن اسكەري قىزمەتشىلەر قاتىستى.
پرەزيدەنت ەردوعان اتاتۇرىكتىڭ كەسەنەسىنە قىزىل جانە اق قالامپىردان جاسالعان جارتى اي مەن جۇلدىز بەينەسىندەگى گۇل شوعىن قويدى.
ساعات 09:05- تە، ياعني وسىدان 88 جىل بۇرىن مۇستافا كەمال اتاتۇرىك قايتىس بولعان ۋاقىتتا، بۇكىل ەل بويىنشا ءبىر مينۋت ۇنسىزدىك جاريالاندى. وعان تۇركيانىڭ بارلىق قالاسى مەن ەلدى مەكەن تۇرعىندارى قوسىلدى.
وسى ساتتە كوشەلەردەگى قوزعالىس توقتاپ، جۇرگىزۋشىلەر كولىكتەرىنەن شىعىپ، ءۇنسىز تۇردى. جاياۋ جۇرگىنشىلەر دە ايالداپ، ءبىر مينۋت ۇنسىزدىك جاريالاۋ راسىمىنە قاتىستى. تۇركيا تۇرعىندارى قاي جەردە جۇرسە دە، ەلدىڭ نەگىزىن قالاۋشى مۇستافا كەمال اتاتۇرىكتىڭ رۋحىنا تاعزىم ەتتى.
ەسكە سالايىق، بۇعان دەيىن تۇركيا پرەزيدەنتى رەجەپ تايپ ەردوعان اتاتۇرىك اۋەجايىن الەمدەگى ەڭ ءىرى تەحنولوگيالىق حابقا اينالدىرۋدى ۇسىنعانىن جازعان ەدىك.
اۆتورلار
مەيىرمان لەس