تۇركيانىڭ «دەيلي ساباح» باسىلىمى جازعانداي، ەل ءوزىنىڭ العاشقى اي ميسسياسىنا ارنالعان عارىش اپپاراتىن ءوندىرۋ، قۇراستىرۋ جانە بىرىكتىرۋ جۇمىستارىن اياقتادى. قازىر اپپارات TUSA Ş اەروعارىش كومپانياسىنىڭ عارىش جۇيەلەرىن بىرىكتىرۋ جانە سىناۋ ورتالىعىندا جۇيەلىك سىناقتان ءوتىپ جاتىر.
ماسساسى شامامەن 3,5 توننا بولاتىن اپپارات ەكى ايعا جۋىق ۋاقىت ىشىندە اي بەتىنەن شامامەن 100 شاقىرىم بيىكتىكتەگى شەڭبەرلىك پوليارلىق وربيتاعا شىعۋى ءتيىس. ونىڭ كەمىندە ءۇش اي جۇمىس ىستەۋى جوسپارلانعان. ال مىندەتتەر ءساتتى ورىندالعان جاعدايدا ميسسيا مەرزىمى 18 ايعا دەيىن ۇزارتىلۋى مۇمكىن.
نەگىزگى باعدارلاما اياسىندا كۇن جەلىن، ايدىڭ ماگنيت ءورىسى مەن جىلۋلىق سيپاتتامالارىن، سونداي-اق ونىڭ بەتىندە سۋدىڭ ءتۇزىلۋ ۇدەرىستەرىن زەرتتەۋ كوزدەلگەن. عىلىمي جۇمىستار اياقتالعاننان كەيىن اپپاراتتى باسقارىلاتىن تومەندەۋ ارقىلى ايدىڭ بەتىنە قاراي باعىتتاۋ جوسپارلانىپ وتىر.
اپپاراتتىڭ 80 پايىزدان استامى وتاندىق تەحنولوگيالاردى پايدالانا وتىرىپ وندىرىلگەن. نەگىزگى كومپونەنتتەردىڭ ءبىرى تۇركيادا ازىرلەنگەن گيبريدتى قوزعالتقىش جۇيەسى بولادى.
سىناقتار اياقتالعاننان كەيىن اپپارات ۇشىرۋعا دايىندىق جۇمىستارىن جۇرگىزۋ ءۇشىن ا ق ش- قا جىبەرىلەدى. ونى كەننەدي اتىنداعى عارىش ايلاعىنان ۇشىرۋ جوسپارلانعان.
بۇعان دەيىن گيبريدتى قوزعالتقىشى بار الەمدەگى العاشقى جەرسەرىكتى تۇركيا وربيتاعا شىعارعانى حابارلانعان بولاتىن.