تۇركيا پارلامەنتى شۆەتسيانىڭ ناتو-عا كىرۋىن ماقۇلدادى

انكارا. KAZINFORM - تۇرىك پارلامەنتى بىرنەشە رەت كەيىنگە قالدىرىپ كەلگەن ماسەلەگە نۇكتە قويدى. دەپۋتاتتار باسىم داۋىسپەن شۆەتسيانىڭ ناتو-عا كىرۋىن ماقۇلدادى (287-گە قارسى 55 داۋىس).

تۇركيا باسشىسى رەجەپ تايپ ەردوعان الداعى كۇندەرى راتيفيكاتسيالىق قۇجاتقا قول قويادى دەپ كۇتىلىپ وتىر.

ونداعان جىلدار بويى اسكەري وداقتارعا قوسىلماعان شۆەتسيا رەسەيدىڭ ۋكرايناعا اگرەسسياسى باستالعاننان كەيىن 2022 -جىلى فينليانديامەن بىرگە ناتو-عا قوسىلۋ جونىندە ءوتىنىش بەردى.

ناتو مۇشەلەرىنىڭ كوپشىلىگى ەكى ەلدىڭ دە اليانسقا قابىلدانۋىن تەز ارادا راتيفيكاتسيالادى، ءبىراق شۆەتسيانى كۇردىستان جۇمىسشى پارتياسىنىڭ مۇشەلەرىنە باسپانا بەردى دەپ ايىپتاعان تۇركيا بۇل پروتسەستى كەيىنگە قالدىردى.

ناتيجەسىندە فينليانديا وتكەن جىلدىڭ ءساۋىر ايىندا ناتو-عا تولىققاندى مۇشە بولدى، ال شۆەتسيا قوسىلۋ پروتسەسىن وسى كۇنگە دەيىن اياقتاي المادى.

«بۇگىن ءبىز ناتو- نىڭ تولىق مۇشەلىگىنە تاعى ءبىر قادام جاقىندادىق»، - دەپ جازدى شۆەتسيا پرەمەر-ءمينيسترى ۋلف كريستەرسسەن الەۋمەتتىك جەلىدە.

شۆەتسيانىڭ ءوتىنىشىن ماجارستان ءالى راتيفيكاتسيالاعان جوق: ەل پرەمەر-ءمينيسترى ۆيكتور وربان سەيسەنبىدە ارىپتەسىن وسى ماسەلە بويىنشا كەلىسسوز جۇرگىزۋگە بۋداپەشكە شاقىردى.

الايدا شۆەتسيا سىرتقى ىستەر ءمينيسترى توبياس بيللسترەم قازىر ۆەنگريالىق تاراپپەن بىردەڭە تالقىلاۋعا ەشقانداي سەبەپ كورىپ تۇرماعانىن ايتتى.

ناتو باس حاتشىسى يەنس ستولتەنبەرگ تۇرىك پارلامەنتىنىڭ شەشىمىن قۇپتاپ، ماجارستاننىڭ دا الداعى ۋاقىتتا ستوكگولم ءوتىنىشىن قولدايتىنىنا ءۇمىت ءبىلدىردى.

«مەن ماجارستاننىڭ راتيفيكاتسيانى مۇمكىندىگىنشە تەزىرەك اياقتاۋىن كۇتەمىن. شۆەتسيانىڭ مۇشەلىگى ناتو-نى كۇشەيتىپ، ءبارىمىزدى قاۋىپسىز ەتەدى»، - دەدى ول.

اۆتور

زارينا تۋعانبايەۆا