تۇركى مەملەكەتتەرى ۇيىمىنىڭ ورتالىق بانكتەر كەڭەسى قۇرىلادى

استانا. KAZINFORM - بۇل تۋرالى بۇگىن بىشكەكتە وتكەن تۇركى مەملەكەتتەرى ۇيىمىنىڭ سامميتىندە سويلەگەن سوزىندە مەملەكەت باسشىسى قاسىم-جومارت توقايەۆ ءمالىم ەتتى.

مەملەكەت باسشىسى سوزىندە ۇيىمعا مۇشە ەلدەر اراسىندا قارجى-ينۆەستيتسيا سالاسىنداعى ىنتىماقتاستىقتى نىعايتۋ قاجەت ەكەنىن ايتتى.

قاسىم-جومارت توقايەۆتىڭ پىكىرىنشە، بۇل باعىتتا تۇركى ينۆەستيتسيالىق قورى ەرەكشە ءرول اتقارىپ كەلەدى. سونىمەن قاتار پرەزيدەنت تاراپتاردىڭ ورتالىق بانكتەر كەڭەسىن قۇرۋ تۋرالى باستامانى ءبىراۋىزدان قۇپتاعانىن جەتكىزدى.

- تۇركى الەمىن ەكونوميكالىق تۇرعىدان ودان ءارى وركەندەتۋ ءۇشىن ورتا ءدالىزدىڭ الەۋەتىن تولىق پايدالانعان ءجون. ونىڭ ستراتەگيالىق ءمانى بار. سوندىقتان تاسىمالداۋ جولدارىنا قاتىستى بىرلەسكەن كەلىسىم جاساۋ قاجەت. مۇنداي قادام تۇراقتى دامۋدى قامتاماسىز ەتەدى. ۇيىمعا مۇشە مەملەكەتتەر بۇل باستاماعا قولداۋ بىلدىرەدى دەپ سەنەمىن، - دەدى پرەزيدەنت.

مەملەكەت باسشىسىنىڭ پىكىرىنشە، ۇيىم اياسىندا ساۋدا-ەكونوميكا، ەنەرگەتيكا، قارجى جانە ينۆەستيتسيا سالالارىنداعى بايلانىستار دا بەكي تۇسكەن.

- تۇركى ينۆەستيتسيالىق قورى ءوز قىزمەتىن ءتيىمدى جالعاستىرىپ كەلەدى. مۇنى تۇركى ينتەگراتسياسىن تەرەڭدەتۋگە باعىتتالعان قادام دەپ باعالايمىن. بۇگىنگى سامميتكە قىرعىز باۋىرلارىمىز «ەكونوميكالىق ينتەگراتسيا، تۇراقتى دامۋ، سيفرلىق بولاشاق جانە قاۋىپسىزدىك» تاقىرىبىن ۇسىنىپ وتىر. بۇل ۇسىنىس ءبارىمىزدىڭ مۇددەمىزگە ساي كەلەدى. سوڭعى 10 جىلدا ۇيىم مۇشەلەرى اراسىنداعى ەكونوميكالىق بايلانىستار نىعايا ءتۇستى. بيىل ءوزارا ساۋدا اينالىمى 45 ميلليارد دوللاردان استى. وسى كورسەتكىشتى ءالى دە ۇلعايتۋعا بولادى. وعان مۇمكىندىگىمىز جەتەدى، - دەدى پرەزيدەنت.

ايتا كەتەيىك، بۇگىن مەملەكەت باسشىسى قاسىم- جومارت توقايەۆتىڭ تۇركى مەملەكەتتەرى ۇيىمىنىڭ سامميتىنە قاتىسقانىن جازدىق.

اۆتور

ايدار وسپاناليەۆ