تۇركى مەملەكەتتەرى ۇيىمىنىڭ كەزدەسۋىندە قازاقستان قانداي باستامالاردى العا تارتتى

استانا. KAZINFORM - بىشكەكتە تۇركى مەملەكەتتەرى ۇيىمىنا قاتىسۋشى ەلدەردىڭ ەكونوميكا جانە ساۋدا مينيسترلەرىنىڭ 13- كەزدەسۋى ءوتتى، دەپ حابارلايدى ق ر ۇكىمەتىنىڭ باسپا ءسوز قىزمەتى.

وعان قازاقستان پرەمەر-ءمينيسترىنىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ، سونداي-اق ازەربايجان، تۇركيا، قىرعىزستان، وزبەكستان جانە ۆەنگريادان كەلگەن دەلەگاتسيالار قاتىستى.

كەزدەسۋدىڭ باستى تاقىرىبى ت م ۇ- عا مۇشە مەملەكەتتەردىڭ ەكونوميكالىق دامۋى مەن ىنتىماقتاستىعىن ودان ءار نىعايتۋ ماسەلەلەرى بولدى.

ۆيتسە-پرەمەر قازاقستان تۇركى ينتەگراتسياسىنىڭ دامۋىنا ەرەكشە ءمان بەرەتىنىن جانە باۋىرلاس مەملەكەتتەردىڭ باستامالارى مەن سىندارلى ۇسىنىستارىن ءارقاشان قۇپتايتىنىن اتاپ ءوتتى.

«ت م ۇ اياسىندا قۇرىلعان تۇركى ينۆەستيتسيالىق قورى ەكونوميكالىق جانە ينۆەستيتسيالىق ىنتىماقتاستىقتى كەڭەيتۋگە، بىرلەسكەن ينۆەستيتسيالىق جوبالاردى ىسكە اسىرۋعا، ەلدەرىمىزدىڭ قارقىندى ءوسۋى مەن وركەندەۋى ءۇشىن كاپيتالداردى، تەحنولوگيالار مەن تالانتتاردى تارتۋعا دەگەن ورتاق ۇمتىلىستى ايعاقتايدى»، - دەدى نۇرلان بايبازاروۆ.

ت م ۇ ەلدەرىنىڭ بارلىق مينيسترلەرى قازاقستاننىڭ ت م ۇ جاسىل قارجى جونىندەگى كەڭەسىن، سونداي-اق ت م ۇ- عا مۇشە مەملەكەتتەردىڭ ورتالىق (ۇلتتىق) بانكتەر كەڭەسىن قۇرۋ تۋرالى باستامالارىن قولدادى.

ت م ۇ ەكونوميكا جانە ساۋدا مينيسترلەرىنىڭ كەلەسى كەزدەسۋى تۇركىستاندا وتەدى. وندا قازاقستاننىڭ بارلىق ت م ۇ ەلدەرى قولداعان تاعى ءبىر باستاماسى «TURAN» ارنايى ەكونوميكالىق ايماعىن اشۋ جوسپارلانىپ وتىر.

انىقتاما: تۇركىتىلدەس مەملەكەتتەردىڭ ىنتىماقتاستىق كەڭەسى 2009-جىلعى 3قازاندا قۇرىلدى. 2021-جىلى كەڭەس تۇركى مەملەكەتتەرىنىڭ ۇيىمى بولىپ قايتا قۇرىلدى.

2024-جىلدىڭ 8 ايىنىڭ قورىتىندىسى بويىنشا قازاقستان مەن ت م ۇ ەلدەرى اراسىنداعى ءوزارا ساۋدا كورسەتكىشى $7,2 ميللياردتى قۇرادى.

2024-جىلى ت م ۇ- نىڭ اياسىندا تۇركى ينۆەستيتسيالىق قورى ياعني، تۇركى الەمى ەلدەرى ەكونوميكالىق ينتەگراتسياسىنىڭ العاشقى بىرلەسكەن قارجى ينستيتۋتى قۇرىلدى.

تۇركى ينتەگراتسياسى ترانزيتتىك-كولىك ماسەلەلەرىنەن باستاپ، ەكونوميكا، ەكولوگيا، عىلىم، ءبىلىم، ونەر، تۋريزم، سپورت پەن گۋمانيتارلىق سالاعا دەيىنگى ىنتىماقتاستىقتىڭ كەڭ اۋقىمىن قامتيدى.

قازىرگى ۋاقىتتا ۇيىمعا 5 مۇشە جانە 2 باقىلاۋشى مەملەكەت كىرگەن. وعان مۇشە مەملەكەتتەر: ازەربايجان، قازاقستان، قىرعىزستان، تۇركيا، وزبەكستان. باقىلاۋشى مەملەكەتتەر: ۆەنگريا، تۇرىكمەنستان.

وسىعان دەيىن قازاقستان مەن تۇركى ەلدەرى دونورلاردىڭ ءبىرىڭعاي اقپاراتتىق جۇيەسىن قۇراتىنىن حابارلادىق.