تۇركى مەملەكەتتەرى قاي سالالاردا بىرلەسكەن جۇمىس جۇرگىزەدى
ق ر سىرتقى ىستەر ءمينيسترى مۇرات نۇرتىلەۋ 2024 -جىلى قازاقستاننىڭ تۇركى مەملەكەتتەرى ۇيىمىنا ءتوراعالىعىندا قاي سالالارداعى ىنتىماقتاستىققا كوڭىل بولىنەتىنىن ايتىپ بەردى، دەپ حابارلايدى Kazinform اگەنتتىگى.
«وزدەرىڭىز بىلەتىندەي، بۇگىن قازاقستان تۇركى مەملەكەتتەرى ۇيىمىنىڭ ءتوراعالىعىن قابىلدايدى. ءبىزدىڭ باسىمدىقتارىمىز ءوزارا تۇسىنىستىكتى نىعايتۋعا جانە باۋىرلاس حالىقتار اراسىنداعى ىنتىماقتاستىقتى ستراتەگيالىق ارىپتەستىكتىڭ جاڭا دەڭگەيىنە شىعارۋعا باعىتتالادى. ونىندا ت م ۇ سامميتى داستۇرلەردى، بىرىگۋدى، رەفورمالاردى، ءبىلىمدى، سەنىمدى، ينۆەستيسيالاردى، دەلدالدىقتى جانە ەنەرگيانى بەينەلەيتىن «TURKTIME» ۇرانىمەن وتەدى. ءبىز سونداي-اق قازاقستان ءتوراعالىعىنىڭ 2023-2024 -جىلدارعا ارنالعان تۇجىرىمدامالىق قۇجاتىن دايىندادىق»، - دەدى م. نۇرتىلەۋ تۇركى مەملەكەتتەرى ۇيىمىنىڭ سىرتقى ىستەر مينسترلەرى كەڭەسىنىڭ وتىرىسىندا.
مينيستر ايتقانداي، قازاقستان بارلىق مۇشە مەملەكەتتەردىڭ تاريحي بايلانىستاردى نىعايتۋعا جانە وڭىرلىك جانە كونتينەنتتىك ينتەگراتسياعا جاردەمدەسۋگە بەلسەندى قاتىسۋىنا سەنەدى.
«ءبىزدىڭ ەلدەرىمىزدىڭ ت م ۇ شەڭبەرىندەگى ساياسي جانە ەكونوميكالىق ىنتىماقتاستىعىندا جاڭا بەلەستەرگە قول جەتكىزۋگە بارلىق مۇمكىندىكتەرى بار. قازىرگى ۋاقىتتا ءبىز كولىك پەن لوگيستيكادان كليماتقا، اقپاراتتىق تەحنولوگيالارعا جانە تۋريزمگە دەيىنگى كوپتەگەن سالالاردا پەرسپەكتيۆالى مۇمكىندىكتەردى كورىپ وتىرمىز. مەن تۇركى ىنتىماقتاستىعىنىڭ ءداستۇرلى رۋحىندا وسى باعىتتاردى زەرتتەۋ بويىنشا بىرلەسكەن جۇمىسىمىزدى اسىعا كۇتەمىن»، - دەدى مۇرات نۇرتىلەۋ.
ساياسي بايلانىستاردان بولەك، ساۋدا- ەكونوميكالىق قاتىناستار ءارقاشان ت م ۇ مۇشە مەملەكەتتەر اراسىنداعى ىنتىماقتاستىقتىڭ بەرىك نەگىزى بولدى جانە بولىپ قالا بەرەدى. وتكەن جىلدىڭ قورىتىندىسى بويىنشا قازاقستان مەن ت م ۇ ەلدەرى اراسىنداعى تاۋار اينالىمى 13 ميلليارد دوللارعا (8,4+) جەتكەن.
«بۇل قۋاتتى ديناميكا ساقتالعان جانە بيىلعى جىلدىڭ العاشقى سەگىز ايىندا ءوزارا تاۋار اينالىمىمىز 8 ميلليارد دوللاردان استى. ءبىزدىڭ كوزقاراسىمىز بويىنشا، جاڭادان قۇرىلعان تۇركى ينۆەستيسيالىق قورى ءتيىمدى تەتىك رەتىندە وڭىرىشىلىك ساۋدانى دامىتىپ، ەكونوميكالىق بەلسەندىلىكتى ىنتالاندىرادى. اسىرەسە ءورشىل ينفراقۇرىلىمدىق جانە كولىكتىك جوبالار اياسىندا وڭىرىشىلىك ىنتىماقتاستىقتى ودان ءارى كۇشەيتۋ ءۇشىن ءالى دە پايدالانىلماعان الەۋەت بار. قىتاي مەن ەۋروپا اراسىندا ورتالىق ازيا مەن كاۆكاز ارقىلى جاڭا، تيىمدىرەك جانە تۇراقتى كولىك مارشرۋتتارى قالىپتاسۋدا. قازىرگى ۋاقىتتا قازاقستان مەن ونىڭ حالىقارالىق سەرىكتەستەرى ترانسكاسپي حالىقارالىق كولىك مارشرۋتىنداعى كەدەرگىلەردى جويۋعا باسىمدىق بەرەدى»، - دەدى سىرتقى ىستەر ءمينيسترى.
وعان قوسا، مەملەكەت باسشىسى قاسىم-جومارت توقايەۆ 2025 -جىلعا قاراي ەلىمىزدە 100 مىڭ جوعارى دارەجەلى IT ماماندارىن دايارلاۋ جانە ورتالىق ازيانى ترانسكونتينەنتالدى تسيفرلىق ورتالىق رەتىندە ورنالاستىرۋدى تاپسىرعان ەدى.
«ءبىزدىڭ ەلىمىز قازاقستاننىڭ ت م ۇ-عا ءتوراعالىعى شەڭبەرىندە وزىق بانكتىك ەكوجۇيەلەردى، ەلەكتروندىق كوممەرتسيا پلاتفورمالارىن جانە ەلەكتروندىق ۇكىمەت ينفراقۇرىلىمىن قۇرۋداعى ءوز تاجىريبەسىمەن بولىسۋگە دايىن. وسىعان بايلانىستى «Astana Hub» حالىقارالىق تەحنوپاركى ءبىزدىڭ ەلدەرىمىز اراسىنداعى ساراپشىلار مەن بيزنەس- قوعامداستىقتىڭ ىنتىماقتاستىعىنا جاردەمدەسۋدە شەشۋشى ءرول اتقارا الار ەدى. اقپاراتتىق تەحنولوگيالار سالاسى ءۇشىن ءتيىستى ت م ۇ قۇجاتىن قابىلداۋ ءبىزدىڭ ءوزارا مۇددەلەرىمىزگە ساي كەلەتىنىنە سەنىمدىمىن»، - دەدى م. نۇرتىلەۋ.
ءسوز سوڭىندا مينيستر ت م ۇ ەلدەرىن كليماتتىڭ وزگەرۋىنە قارسى كۇرەستە، مادەني- گۋمانيتارلىق ىنتىماقتاستىقتا، عىلىم، سپورت، تۋريزم، ءبىلىم جانە مادەنيەت سياقتى سالالاردا ءوز الەۋەتىن تولىق پايدالانۋعا شاقىردى.
بۇعان دەيىن مۇرات نۇرتىلەۋ يزرايل-پالەستينا قاقتىعىسىنداعى قازاقستان ۇستانىمىن ايتقان ەدى.
ايتا كەتەيىك، استانادا تۇركى مەملەكەتتەرىنىڭ سىرتقى ىستەر مينيسترلەرى باس قوستى. وتىرىس جابىق فورماتتا وتۋدە.
بۇگىن ەلوردادا تۇركى مەملەكەتتەرى ۇيىمىنىڭ (ت م ۇ) مەرەيتويلىق X سامميتى وتەدى. بۇل جيىنعا تۇركى مەملەكەتتەرى ۇيىمىنا مۇشە ازەربايجان، قىرعىزستان، تۇركيا، وزبەكستان پرەزيدەنتتەرى، سونداي-اق ت م ۇ- داعى باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى. سامميت «تۇركى ءداۋىرى» ۇرانىمەن وتەتىن جوعارى دەڭگەيدەگى پىكىرتالاستار ءۇشىن ماڭىزدى الاڭ بولادى.