ەكى كۇنگە سوزىلاتىن تۋرنيرگە جالپى 220 كوماندا تىركەلگەن. ونىڭ 45 تەن استامى تۇركيا، ازەربايجان، وزبەكستان، قىرعىزستان، تۇرىكمەنستان جانە تاجىكستاننان كەلگەن كوماندالار.
چەمپيونات بارىسىندا وقۋشىلار وزدەرى قۇراستىرعان ءارى باعدارلامالاعان روبوتتارىن ءتۇرلى تاپسىرمالار بويىنشا جارىستىرادى. قاتىسۋشىلار روبوت جارىسى، زاتتاردى سۇرىپتاۋ، كەدەرگىلەردەن ءوتۋ، دالدىك تاپسىرمالارى مەن ينجەنەرلىك جوبالار باعىتتارىندا سىنعا تۇسەدى. بيىل تۋرنير 9 باعىت بويىنشا ۇيىمداستىرىلعان. ال بۇگىن ءتورت ساناتتا ءوزارا باق سىنادى.
Robotek Grand Tournament Astana 2026 ۇيىمداستىرۋشىسى سانجار شالقاربەكوۆتىڭ ايتۋىنشا، روبوتوتەحنيكاعا قىزىعۋشىلىق تانىتىپ جۇرگەن بالالار سانى جىل سايىن ارتىپ كەلەدى.
- چەمپيونات قاتىسۋشىلارىنىڭ 30 پايىزى اۋىلدىق جەرلەردەن كەلگەن. تاعى 30 پايىزى وبلىس ورتالىقتارىنان قاتىسىپ جاتىر. سونىمەن قاتار جارىستا باق سىنايتىن جاس ينجەنەرلەردىڭ 10 پايىزى - قىز بالالار. ءبىز روبوتوتەحنيكا مەن STEM ءبىلىم بەرۋ سالاسىنداعى گەندەرلىك ستەرەوتيپتەردى جويىپ، قىزداردىڭ وسى باعىتقا قىزىعۋشىلىعىن ارتتىرۋعا ەرەكشە كوڭىل ءبولىپ جاتىرمىز، - دەدى ول.
جارىسقا قاتىسۋشىلاردىڭ ءبىرى، 7-سىنىپ وقۋشىسى ءابىلمانسۇر قۇرامىس. ول دوسى تامەرلان بەكەتوۆپەن بىرگە اقتوبە وبلىسىنان كەلگەن. جاس ينجەنەرلەر قۇرىلعىنى وزدەرى باعدارلامالاپ، ءتۇرلى داتچيكتەر ارقىلى باسقارادى.
- روبوتتا جارىق داتچيگى بار. ول كۋبيككە بارعان كەزدە ونىڭ قاي جەردە تۇرعانىن انىقتايدى. ول ءۇشىن ءبىز كومپيۋتەر ارقىلى پروگرامما جازامىز. ال باسقارۋ پانەلى ارقىلى روبوتتىڭ پروگراممالارىن قوسىپ، ەنگىزەمىز. بۇل روبوتتى 2 كۇندە EV3 كونسترۋكتورلارىنان قۇراستىرىپ شىعاردىق، - دەيدى چەمپيونات قاتىسۋشىسى.
چەمپيونات اياسىندا «ۇزدىك اۋىل كومانداسى»، «ۇزدىك شەتەلدىك كوماندا»، «ۇزدىك ينجەنەرلىك شەشىم» جانە «ۇزدىك قىزدار كومانداسى» سەكىلدى ارنايى نوميناتسيالار قاراستىرىلعان. سونداي-اق جەڭىمپازدارعا سەرىكتەس جوعارى وقۋ ورىندارىنىڭ ءبىلىم گرانتتارى تابىستالادى. وسىلايشا حالىقارالىق تۋرنير جاس ونەرتاپقىشتاردىڭ ينجەنەرلىك قابىلەتىن شىڭداپ قانا قويماي، ولاردىڭ بولاشاق ماماندىق تاڭداۋىنا دا مۇمكىندىك بەرمەك.
ەسكە سالا كەتەيىك، قازاقستاندىق وقۋشىلار ەكولوگيالىق ماسەلەلەردى شەشۋگە ارنالعان سۋاستى روبوتىن جاسادى.