- سوڭعى جىلدارى ۇيىم قىزمەتىنىڭ اياسى كەڭەيدى، بۇل قۇرىلىم 60 ءتۇرلى باعىتتا جۇمىس جۇرگىزىپ جاتىر. دەگەنمەن ولاردىڭ كەيبىرى ءبىر-ءبىرىن قايتالايتىنى جاسىرىن ەمەس. سوندىقتان ورتاق ىستە باسىمدىق بەرىلۋگە ءتيىس سالالاردى انىقتاپ الۋىمىز كەرەك. جالپى، الدىمىزدا تۇرعان مىندەتتەر مەن باسىمدىقتاردى ايقىنداۋ قاجەت. سونىمەن قاتار ۇيىمىمىزدىڭ ەڭ جوعارى دەڭگەيىندە قول قويىلعان شارتتاردىڭ ەرەجەلەرىن بۇزۋعا بولمايدى دەپ سانايمىن. سونداي-اق ۇيىم جانىنداعى تۇراقتى وكىلدەر كەڭەسىن قۇرۋ ماڭىزدى ەكەنىن تاعى دا ايتا كەتكەن ءجون. بيىل مامىر ايىندا تۇركىستاندا وتكەن ەڭ جوعارى جيىندا مەن تۇركى مەملەكەتتەرى ۇيىمى اسكەري اليانس ەمەس، بولاشاقتا دا بولماۋى كەرەك دەپ ايتقان ەدىم. بۇل - قازاقستاننىڭ ۇستانىمى، - دەدى قاسىم-جومارت توقايەۆ.
مەملەكەت باسشىسى ءسوز سوڭىندا قازاقتا «بەرەكە - بىرلىكتە، ىرىس - ىنتىماقتا» دەگەن ماقال بار ەكەنىن ەسكە سالىپ، ءبىر جەڭنەن قول، ءبىر جاعادان باس شىعارىپ، ورتاق ماقسات جولىندا بىرلەسە ارەكەت ەتۋ كەرەكتىگىن ايتتى. سوندا ءتۇبى ءبىر تۇركى جۇرتى دا ءوسىپ- وركەندەي بەرەدى.
- بۇگىنگى باسقوسۋ ۇيىم جۇمىسىنا جاڭا سەرپىن بەرىپ، ىقپالداستىعىمىزدى نىعايتا تۇسەدى دەپ سەنەمىن. وسى ورايدا، ازەربايجان مەملەكەتى ۇيىمعا بىلتىردان بەرى ءتوراعالىق ەتىپ، ونىڭ ابىروي-بەدەلىنىڭ ارتۋىنا مول ۇلەس قوسقانىن باسا ايتقىم كەلەدى. مەن ازەربايجان تاراپىنا ريزاشىلىعىمدى بىلدىرەمىن. ەندى ءتوراعالىق ەتۋ مىندەتى تۇركياعا جۇكتەلەدى. الداعى ۋاقىتتا دا ۇيىم اياسىندا تىڭ باستامالار جۇزەگە اسىرىلادى دەپ سەنەمىن. سونداي-اق كۋبانىچبەك ومۋراليەۆ مىرزاعا تاباندى قىزمەتى ءۇشىن العىس ايتامىن. ال جاڭا باس حاتشى ميرۆوحيد ازيموۆقا ساتتىلىك تىلەيمىن. القالى جيىندى جوعارى دارەجەدە وتكىزگەنى ءۇشىن تۇركيا رەسپۋبليكاسىنىڭ پرەزيدەنتىنە تاعى دا ريزاشىلىعىمدى بىلدىرەمىن، - دەدى قازاقستان پرەزيدەنتى.
سونداي-اق سامميتتە تۇركيا پرەزيدەنتى رەجەپ تاييپ ەردوعان، قىرعىزستان پرەزيدەنتى سادىر جاپاروۆ، وزبەكستان پرەزيدەنتى شاۆكات ميرزيەيەۆ، تۇرىكمەنستان پرەزيدەنتى سەردار بەردىمۇحامەدوۆ، ازەربايجان سىرتقى ىستەر ءمينيسترى دجەيحۋن بايراموۆ، ت م ۇ باس حاتشىسى كۋبانىچبەك ومۋراليەۆ ءسوز سويلەدى.
تۇركى مەملەكەتتەرى ۇيىمى 13-سامميتىنىڭ قورىتىندىسى بويىنشا انكارا دەكلاراتسياسى قابىلداندى.
ايتا كەتەلىك پرەزيدەنت تۇركى جۇرتى توننىڭ ىشكى باۋىنداي تاتۋ بولىپ، العا نىق قادام جاساپ وتىرعانىن ايتقان ەدى.