تۇركى ەلدەرى اراسىندا جۇك تاسىمالىن دامىتاتىن بىرلەسكەن كوميتەت قۇرىلادى

استانا. KAZINFORM - سەنات «تۇركى مەملەكەتتەرى ۇيىمىنا مۇشە مەملەكەتتەردىڭ ۇكىمەتتەرى اراسىنداعى حالىقارالىق قۇرامداستىرىلعان جۇك تاسىمالى تۋرالى كەلىسىمدى راتيفيكاتسيالاۋ تۋرالى» زاڭدى ماقۇلدادى.

زاڭ جوباسى بويىنشا بايانداما جاساعان سەناتور امانگەلدى نۇعمانوۆتىڭ ايتۋىنشا، تۇركى مەملەكەتتەرى ۇيىمىنا مۇشە مەملەكەتتەردىڭ ۇكىمەتتەرى اراسىنداعى حالىقارالىق قۇرامداستىرىلعان جۇك تاسىمالى تۋرالى كەلىسىمگە 2022-جىلى 11-قاراشادا وزبەكستاندا تۇركى مەملەكەتتەرى ۇيىمى مەملەكەت باسشىلارىنىڭ قاتىسۋىمەن وتكەن 9-سامميت اياسىندا قول قويىلدى.

كەلىسىم ماقساتى - ءارتۇرلى كولىك تۇرلەرىن پايدالانا وتىرىپ، حالىقارالىق جۇك تاسىمالدارىن جەڭىلدەتۋ، سونداي-اق تۇركى مەملەكەتتەرى ۇيىمىنا مۇشە مەملەكەتتەر اراسىنداعى ترانزيتتىك جانە ساۋدا-ەكونوميكالىق ىنتىماقتاستىقتى دامىتۋ.

«2023-جىلدىڭ قورىتىندىسى بويىنشا قازاقستان مەن تۇركى مەملەكەتتەرى ۇيىمىنا مۇشە-مەملەكەتتەر اراسىنداعى جۇك تاسىمالداۋ كولەمى 35 ميلليون توننانى قۇرادى. بۇل 2022-جىلمەن سالىستىرعاندا 20 پايىزعا ارتىق. 2022-جىلى 29 ميلليون توننا بولعان ەدى. بۇگىنگى تاڭدا كوپتەگەن مەملەكەت ءۇشىن ىنتىماقتاستىقتىڭ ستراتەگيالىق جوباسى ترانسكاسپيلىك حالىقارالىق كولىك باعىتى بولىپ وتىر. قىتايدى، ورتالىق ازيانى جانە ەۋروپانى بايلانىستىراتىن بۇل كولىك ارتەرياسى «بەلدەۋ مەن جولدىڭ» كونتينەنتالدى كوپىرىنە اينالادى، جۇك تاسىمالداۋ مەرزىمىن ەكى ەسە قىسقارتادى جانە كولىك شىعىندارىن ايتارلىقتاي تومەندەتەدى»، - دەدى ول.

سەناتوردىڭ ايتۋىنشا، وسى كولىك باعىتىن دامىتۋ ماقساتىندا تەمىرجول، پورت ينفراقۇرىلىمىن جاڭعىرتۋ جانە جىلجىمالى قۇرام مەن ساۋدا فلوتىن ۇلعايتۋ بويىنشا جۇمىستار جۇرگىزىلىپ جاتىر.

اقتاۋ پورتىندا «كونتەينەرلىك حاب» سالىنادى. بۇل جوبا تاسىمالداۋ كولەمىن جىلىنا قوسىمشا 300 مىڭ كونتەينەرگە دەيىن ۇلعايتۋعا مۇمكىندىك بەرەدى.

«قارالىپ وتىرعان زاڭ تەمىر جول، سۋ جانە اۆتوموبيل كولىگىنىڭ زاماناۋي جۇيەلەرىن دامىتۋعا، پويىزداردىڭ كەدەندىك راسىمدەردەن ءوتۋىن جەدەلدەتۋ ءۇشىن الدىن الا اقپارات الماسۋدى قامتاماسىز ەتۋگە، سونداي-اق جۇكتەرگە قاتىستى سيفرلىق تەحنولوگيالاردى ەنگىزۋگە ىقپال ەتەدى. كەلىسىمنىڭ نورمالارىنا سايكەس تۇركى ەلدەرى اراسىنداعى تاسىمالداۋدى دامىتۋ جونىندەگى بىرلەسكەن كوميتەت قۇرىلادى. كەلىسىم قازاقستان ارقىلى ترانزيتتىك جۇك تاسىمالداۋ كولەمىن ودان ءارى ارتتىرۋ ءۇشىن العىشارتتار جاساپ، ەلدىڭ كولىك-ترانزيتتىك الەۋەتىن دامىتۋعا وڭ اسەرىن بەرەدى»، - دەدى امانگەلدى نۇعمانوۆ.