تۇركى بىرلىگى ءۇشىن ورتاق ءالىپبيدىڭ ماڭىزى زور - رەجەپ تايىپ ەردوعان
تۇركيا پرەزيدەنتى رەجەپ تايىپ ەردوعان استانادا ءوتىپ جاتقان تۇركى مەملەكەتتەرى ۇيىمىنىڭ X سامميتىندە باۋىرلاس ەلدەردى ءوزارا ۆيزا بايلانىسىن جەتىلدىرۋگە ۇندەدى، دەپ حابارلايدى Kazinform اگەنتتىگى.
«ءبىز ءۇشىن تۇركى مەملەكەتتەرى اياسىنداعى كولىك جانە ينفراقۇرىلىم باعىتىنداعى جوبالار وتە ماڭىزدى. باكۋ- تبيليسي- جەيحان شيكى مۇناي قۇبىرى، تابيعي گاز قۇبىرى، ترانساناتوليا قۇبىرى، وسىنىڭ ءبارى - ءبىزدىڭ ىنتىماقتاستىعىمىزدىڭ ۇلگىسى. كاسپيدىڭ تابيعي گازىن ەۋروپا مەن تۇركياعا تاسىمالداۋ جالعاسادى. بۇل جوبا ەۋروپانىڭ ەنەرگەتيكالىق قاۋىپسىزدىگى مەن تۇركى مەملەكەتتەرىنىڭ گۇلدەنۋىن قامتاماسىز ەتەدى. سونىمەن قاتار ءبىز كولىك جەلىلەرىنە كوبىرەك كوڭىل ءبولۋىمىز كەرەك. وسىنى ەسكەرە وتىرىپ، ءبىز ءوزىمىزدىڭ ورتاق كاسپي- باتىس- شىعىس ءدالىزىن دامىتۋعا باسىمدىق بەرەمىز. ءبىز ساۋدا مەن كولىك بايلانىستارىنا كەدەرگى كەلتىرەتىن ولقىلىقتاردى ازايتۋىمىز كەرەك. ياعني، ۆيزا پروتسەستەرىن جەڭىلدەتىپ، كەدەندىك كەدەرگىلەردى شەشۋىمىز كەرەك»، - دەدى رەجەپ تايىپ ەردوعان.
سونداي-اق، ورتاق ءالىپبي ماسەلەسى تۋرالى پىكىر ءبىلدىردى.
«ارينە، ءبىزدىڭ بىرلىگىمىز ءۇشىن ءتىل مەن ورتاق ءالىپبي وتە ماڭىزدى. بۇل جەردە پرەزيدەنتتەردىڭ قولداۋى دا وتە ماڭىزدى. وسى باعىتتا ءبىزدىڭ جوعارى ءبىلىم كەڭەسى ارنايى ۇسىنىستارىن ۇيىم حاتشىلىعىنا ايتتى. ول ۇسىنىستار جوعارى باعالانادى دەپ ۇمىتتەنەمىز»، - دەدى تۇركيا پرەزيدەنتى.
ەسكە سالايىق، بۇگىن استانادا تۇركى مەملەكەتتەرى ۇيىمىنىڭ X سامميتى ءوتىپ جاتىر.
جيىنعا تۇركيا، ازەربايجان، وزبەكستان، قىرعىزستان پرەزيدەنتتەرى ۇيىمعا مۇشە مەملەكەت باسشىلارى رەتىندە، ماجارستان پرەمەر-ءمينيسترى مەن تۇرىكمەنستان باسشىسى باقىلاۋشى ەلدىڭ باسشىلارى رەتىندە قاتىسادى.
ت م ۇ سامميتى «تۇركى ءداۋىرى» ۇرانىمەن وتەدى.
بۇگىن سىرتقى ىستەر مينيسترلىگىندە تۇركى مەملەكەتتەرى ۇيىمىنىڭ سىرتقى ىستەر ميينسترلەرى كەڭەسىنىڭ جابىق وتىرىسى ءوتتى.
شارادا ق ر سىرتقى ىستەر ءمينيسترى مۇرات نۇرتىلەۋ يزرايل- حاماس قاقتىعىسىنداعى قازاقستان ۇستانىمىن ايتتى.