الايدا، بۇل ءداۋىردىڭ (XXI عاسىردىڭ) ول داۋىردەن باستى ايىرماشىلىعى - يادرولىق ارسەنالدىڭ بولۋى مەن ونى قولدانۋعا قاتىستى قالىپتاسقان جاسىرىن تىيىم. ەگەر كادىمگى قارۋ-جاراق باسقىنشىنى توقتاتۋعا جەتكىلىكسىز بولسا، ا ق ش پرەزيدەنتى ترامپ سوڭعى شەكتەن اتتاپ شىعىپ، يادرولىق قارۋدى قولدانۋى مۇمكىن بە؟
«The Wall Street Journal» باسىلىمى وسى سۇراققا جاۋاپ ىزدەپ، زەرتتەۋ جاساپتى. بۇگىن سول بولجامدى ىقشامداپ ۇسىنباقپىز...
«يادرولىق تابۋ» جانە سوعىستاردىڭ شەكسىزدىگى...
قىرعيقاباق سوعىس كەزەڭىنەن بەرى يادرولىق قارۋ تەك سوعىسۋ قۇرالى ەمەس، ەڭ الدىمەن «تەجەۋشى فاكتور» مىندەتىن اتقارىپ كەلدى. امەريكا قۇراما شتاتتارى اركەز: «ەگەر ك س ر و باتىس ەۋروپاعا باسىپ كىرسە، يادرولىق سوققى بەرەمىز»، - دەپ اشىق سەس كورسەتىپ، ماسكەۋدىڭ اسكەري كۇشىن تەجەپ وتىردى.
الايدا، باتىس ساراپشىلارىنىڭ پايىمداۋىنشا، وسى كۇنگە دەيىن ساقتالىپ كەلگەن «يادرولىق تابۋدىڭ» كەرى جاعى دا بار:
اۋەلى - يادرولىق دەرجاۆالاردىڭ ءبىر-ءبىرىن تولىق جويىپ جىبەرۋ قاۋپى ءىرى مەملەكەتتەردى تىكەلەي سوقتىعىسۋدان ساقتاندىردى.
ونان سوڭ - ستيحيالىق سوعىستارعا جول اشىلدى. ءبىراق بۇل تابۋ وزگە دە (يادرولىق ەمەس) سوعىستاردى، ايماقتىق اگرەسسيالار مەن گيبريدتى قاقتىعىستاردى توقتاتۋعا دارمەنسىز بولىپ شىقتى.
ناتيجەسىندە، ا ق ش پەن ونىڭ وداقتاستارىنىڭ «سوعىستى ۇلكەيتپەيمىز» دەگەن قورقىنىشى قارسىلاستاردىڭ قول-اياعىن شەشىپ، جەرگىلىكتى ماسشتابتاعى اگرەسسيانى ورشىتە ءتۇستى.
ترامپتىڭ ەسەبى: سوڭعى سەس پە، الدە بوس ءسوز بە؟
ا ق ش- تىڭ بۇرىنعى ستراتەگياسى قارسىلاستىڭ «ۋاشيڭتون شىنىمەن بۇل قادامعا بارادى» دەگەن سەنىمىنە نەگىزدەلگەن ەدى. بۇگىندە ا ق ش پرەزيدەنتى دونالد ترامپتىڭ الدىندا ۇلكەن ديلەمما تۇر.
ەگەر كادىمگى قارۋ-جاراق پەن سانكسيالىق قىسىم باسقىنشىلىقتى توقتاتۋعا جەتكىلىكسىز بولسا، ا ق ش ءوز سەسىن ءىس جۇزىندە دالەلدەۋگە دايىن با؟ بۇعان قاتىستى ساراپشىلار ەكى-ۇشتى پىكىر ايتادى:
بىرىنشىدەن، ەگەر ماسكەۋ، بەيجىڭ نەمەسە تەگەران «ا ق ش ەسكالاتسيادان قورقىپ، يادرولىق باتىرمانى ءبارىبىر باسپايدى» دەپ شەشسە، ا ق ش- تىڭ يادرولىق ارسەنالى ءوز تەجەۋشى كۇشىنەن ايىرىلادى.
ەكىنشىدەن، يادرولىق قارۋدىڭ جاي عانا قويمادا تۇرۋى ەشتەڭەگە كەپىلدىك بەرمەيدى. ەگەر ۋاشيڭتوننىڭ قوقان-لوقىسى جاي ءسوز رەتىندە قابىلدانا باستاسا، بۇل گەوساياسي قارسىلاستاردىڭ تابەتىن وياتىپ، اۋقىمدى اسكەري قاقتىعىستاردىڭ قاۋپىن شارىقتاتىپ جىبەرەدى.
ال الەمدى نە كۇتىپ تۇر؟
دونالد ترامپتىڭ ساياسي ستيلى ءاردايىم «بولجاپ بولمايتىن» (unpredictability) توسىن قادامدارعا نەگىزدەلگەن. ول ءوز قارسىلاستارىن ۇنەمى بەيمالىم كۇيدە ۇستاۋعا تىرىسادى. الايدا، بۇل تاكتيكانىڭ قاۋپى دە جوعارى: كىشكەنتاي ءبىر قاتە ەسەپ بۇكىل ادامزاتتى اپاتقا اكەلۋى مۇمكىن.
ال 1914 جانە 1939-جىلدارداعى قاتەلىكتەر ءىرى دەرجاۆالاردىڭ باسەكەلەستىگى مەن ەسەپتىڭ دۇرىس جاسالماۋىنان تۋىنداعان بولسا، بۇگىنگى تاڭدا ترامپ پەن ا ق ش- تىڭ الدىندا تۇرعان باستى مىندەت - يادرولىق سوعىسقا جول بەرمەي، قارسىلاستى قاتاڭ تەجەۋدىڭ جاڭا تەپە-تەڭدىگىن تابۋ. ولاي بولماعان جاعدايدا، «يادرولىق تابۋعا» سەنىپ ارقانى كەڭگە سالعان الەم تاعى ءبىر جويقىن سوعىستىڭ وشاعىنا اينالۋى عاجاپ ەمەس.
پۋتيننىڭ ۇسىنىسى: مەن، ترامپ جانە شي ۇشەۋىمىز كەزدەسەيىك!
تاقىرىپقا تۇزدىق: الەم يادرولىق قاقتىعىستىڭ جاي-كۇيىنە الاڭداپ وتىرعاندا، رەسەي پرەزيدەنتى پۋتين باستاما كوتەرىپ، قاراشا ايىندا ترامپ پەن شي ۇشەۋىنىڭ كەزدەسۋىن ۇيىمداستىرۋدى ۇسىنىپتى. مۇنى دا «The Wall Street Journal» باسىلىمى جازدى.
قاراپايىم تىلمەن ايتساق، پۋتين ۋكراينا تاعدىرىن زەلەنسكيسىز تالقىلاۋدى ۇسىندى. «The Wall Street Journal» باسىلىمىنىڭ حابارلاۋىنشا، رەسەي پرەزيدەنتى بۇل يدەيانى 9-قازاندا ترامپپەن تەلەفون ارقىلى سويلەسكەن كەزىندە ايتقان.
كەزدەسۋ 18-19-قاراشادا اتەس سامميتى وتەتىن قىتايدىڭ شىنجىن قالاسىندا ءوتۋى مۇمكىن دەگەن بولجام بار. دەگەنمەن، كەلىسسوزدەردىڭ ورنى دا، وتەتىن كۇنى دە ءالى تولىق كەلىسىلگەن جوق.
دونالد ترامپ ءالى كەلىسىم بەرمەگەن. سونىمەن قاتار شيدىڭ دە بۇل باستاماعا قاتىستى ۇستانىمى بەلگىسىز. دەسە دە رەسەي پرەزيدەنتى پۋتيننىڭ باسپا ءسوز حاتشىسى دميتيري پەسكوۆ: «ازىرگە كەزدەسۋدىڭ وزىنە نەمەسە ونىڭ ىقتيمال كۇن تارتىبىنە قاتىستى ناقتى تۇسىنىك جوق، دەگەنمەن ءۇش تاراپ تا مۇنداي كەزدەسۋدى وتكىزۋدىڭ گيپوتەتيكالىق (جورامال) مۇمكىندىگىن مويىندايدى»، - دەيدى.
Mezgil.kz