ترامپقا قاستاندىق جاسالۋى مۇمكىن: يزرايل ا ق ش- قا ەسكەرتۋ جاسادى

استانا. KAZINFORM - يزرايلدىڭ «موسساد» بارلاۋ قىزمەتىنىڭ ايتۋىنشا، يران ا ق ش پرەزيدەنتى دونالد ترامپ پەن ونىڭ اكىمشىلىگىندەگى جوعارى لاۋازىمدى شەنەۋنىكتەرگە قاستاندىق جاساۋدى جوسپارلاپ جاتىر.

Фото: Anadolu

بۇل اقپاراتتى «موسساد» ا ق ش ورتالىق بارلاۋ باسقارماسىنا (س ر ۋ) جەتكىزگەن، - دەپ حابارلايدى يزرايل مەن ا ق ش- تاعى جوعارى لاۋازىمدى دەرەككوزدەرىنە سۇيەنگەن Israel Hayom گازەتى.

باسىلىمنىڭ مالىمەتىنشە، بۇل اقپارات ا ق ش تاراپىنىڭ ءوتىنىشى بويىنشا تەكسەرىلگەن. يزرايل بارلاۋ قىزمەتى جيناعان دەرەكتەردى باتىستىڭ تاعى ءبىر بارلاۋ مەكەمەسى راستاعان دەگەن اقپارات بار. سونداي-اق، «موسساد» باسشىسى رومان گوفمان ۆاشينگتونعا ساپارى كەزىندە و ب ب ديرەكتورى دجون رەتكليففپەن جەكە كەزدەسكەنى حابارلاندى.

ا ق ش- قا بەرىلگەن بارلاۋ مالىمەتتەرىندە جارىلعىش زات تيەلگەن دروندارمەن شابۋىل جاسالۋ قاۋپى ايتىلعان. مۇنداي شابۋىلداردان قورعانۋ ءۇشىن جوعارى لاۋازىمدى تۇلعالاردىڭ قاۋىپسىزدىگىن قامتاماسىز ەتۋدىڭ ۇيرەنشىكتى شارالارى جەتكىلىكسىز بولۋى مۇمكىن.

وسى ەسكەرتۋدەن كەيىن ۆاشينگتوندا قاۋىپسىزدىك شارالارى شۇعىل كۇشەيتىلگەن. دونالد ترامپتىڭ اشىق الاڭداردا ءسوز سويلەۋىنە شەكتەۋ قويىلىپ، پرەزيدەنت قاتىساتىن ءىس-شارالاردا درونداردى انىقتاپ، ولاردىڭ جۇمىسىن توقتاتاتىن ارنايى قۇرىلعىلار ورناتىلعان.

بۇدان بولەك، قاۋىپ ءتونۋى مۇمكىن ءبىرقاتار جوعارى لاۋازىمدى شەنەۋنىك جەكە ۇيلەرىنەن كۇزەتى كۇشەيتىلگەن اسكەري نىساندارعا كوشىرىلگەن.

ولاردىڭ قاتارىندا ا ق ش قارجى ءمينيسترى سكوتت بەسسەنت، مەملەكەتتىك حاتشى ماركو رۋبيو جانە پەنتاگون باسشىسى پيت حەگسەت بار ەكەنى ايتىلدى.

Israel Hayom دەرەككوزدەرىنىڭ ايتۋىنشا، وسى مالىمەتتەر اق ءۇيدىڭ يرانعا قاتىستى ۇستانىمىن قاتاڭداتىپ، ديپلوماتيالىق كەلىسسوزدەردەن باس تارتۋىنا اسەر ەتكەن نەگىزگى سەبەپتەردىڭ ءبىرى بولعان.

بۇعان دەيىن دونالد ترامپ يرانمەن كەلىسسوز جۇرگىزۋدىڭ ەندى قاجەتى جوق ەكەنىن مالىمدەگەن ەدى.

«بىزگە يرانمەن كەلىسىم قاجەت ەمەس. ول ۋاقىت الدەقاشان ءوتتى»، - دەدى ا ق ش پرەزيدەنتى.

يزرايل بارلاۋ قىزمەتىنىڭ يران دونالد ترامپقا قاستاندىق جوسپارلاپ جاتقانى تۋرالى قۇپيا اقپاراتتى ا ق ش- قا بەرگەنى جونىندەگى حابار بۇعان دەيىن دە تاراعان.

ماۋسىمدا The Wall Street Journal باسىلىمى ءوز دەرەككوزدەرىنە سۇيەنىپ، وسىنداي مالىمەت جاريالاعان بولاتىن. سول كەزدە دونالد ترامپ ناتو سامميتى اياسىندا وزىنە قاۋىپ ءتونىپ تۇرعانىن جاناما تۇردە راستاعان.

«ولار ا ق ش باسشىسىن، ياعني مەنى ولتىرگىسى كەلەدى... مەن بارلىق تىزىمدە بارمىن»، - دەپ كەلتىردى ب ا ق ترامپتىڭ ءسوزىن.

جۋىردا ا ق ش قۇپيا قىزمەتىنىڭ وكىلدەرى اق ءۇي ماڭىندا قارۋلانعان ەر ادامدى ۇستادى. ول دونالد ترامپتى ولتىرۋگە نيەتتى ەكەنىن ايتقان.

قۇقىق قورعاۋ ورگاندارىنىڭ مالىمەتىنشە، ۆەنەسۋەلانىڭ 29 جاستاعى ازاماتى ا ق ش پرەزيدەنتىنىڭ رەزيدەنتسياسىنا جاقىن جەردە ۇرلانعان كولىكتە وتىرعان.

كولىكتى ءتىنتۋ كەزىندە ارنايى قىزمەت وكىلدەرى AR-15 ۇلگىسىندەگى قارۋ، ەكى تاپانشا جانە كوپ مولشەردە وق-ءدارى تاپقان.

ۇستالعان ەر ادام جاۋاپ الۋ كەزىندە دونالد ترامپقا قاستاندىق جاساۋ ءۇشىن ۆاشينگتونعا كەلگەنىن ايتقان. ول مۇنداي ارەكەتكە بارۋىنا «باسىنداعى داۋىستاردىڭ بۇيرىعى» سەبەپ بولعانىن مالىمدەگەن.