ترامپتىڭ ەكس-كەڭەسشىسى 100 جىلعا دەيىن باس بوستاندىعىنان ايىرىلۋى مۇمكىن
استانا. KAZINFORM - تەحاستاعى مەگاشىركەۋدىڭ بۇرىنعى پاستورى جانە ا ق ش پرەزيدەنتى دونالد ترامپتىڭ بۇرىنعى كەڭەسشىسى روبەرت مورريس 1982-جىلدان باستاپ 4 جىل بويى جاس قىزعا جىنىستىق زورلىق-زومبىلىق جاسادى دەپ ايىپتالعان.
بۇل تۋرالى وكلاحومانىڭ باس پروكۋرورى حابارلادى.
داللاس پەن فورت-ۋەرتتەگى مەگاشىركەۋدىڭ نەگىزىن قالاۋشى جانە پرەزيدەنت دونالد ترامپتىڭ بۇرىنعى كەڭەسشىسى كامەلەتكە تولماعان قىزعا جىنىستىق زورلىق جاسادى دەپ ايىپتالىپ وتىر. بولجالدى وقيعالار 1980-جىلدارى بولعان.
- وكلاحومانىڭ ۇلكەن القابيلەر سوتى 12-ناۋرىزدا 63 جاستاعى روبەرت پرەستون مورريستى كامەلەتكە تولماعان قىزعا ازعىندىق تانىتتى دەپ ايىپتادى. بولجالدى سەكسۋالدىق زورلىق-زومبىلىق 1982-جىلى جەلتوقساندا مورريس روجدەستۆو كۇنى وكلاحوما شتاتىنىڭ حوميني قالاسىنداعى قىزدىڭ وتباسىنا بارعان كەزدە باستالىپ، ءتورت جىل بويى جالعاستى. بولجالدى جابىرلەنۋشى سول كەزدە 12 جاستا بولعان، - دەلىنەدى وكلاحوما باس پروكۋرورىنىڭ پرەسس-رەليزىندە.
باس پروكۋرور گەنتنەر درامموند بالالارعا جىنىستىق زورلىق-زومبىلىق جاساۋشىلارعا شىدامدىلىق تانىتۋعا بولمايتىنىن ايتتى.
- بۇل ءىستىڭ جەكسۇرىن بولعانى سونشا، قىلمىسكەر ءوز قىزمەتىن پايدالاندى. بۇل ءىس بويىنشا جابىرلەنۋشى ادىلەتتىلىكتى تىم كوپ جىل كۇتتى، - دەدى ول.
ا ق ش پرەزيدەنتى دونالد ترامپتىڭ بۇرىنعى كەڭەسشىسى 63 جاستاعى روبەرت مورريس جاس قىزعا ازعىندىق جاساعانى ءۇشىن كىنالى دەپ تانىلسا، 100 جىلعا دەيىن باس بوستاندىعىنان ايىرىلۋى مۇمكىن.
بۇعان دەيىن روبەرت مورريس 2024-جىلى بالالارعا جىنىستىق زورلىق-زومبىلىق جاسادى دەپ ايىپتالعان سوڭ پرەزيدەنتتىڭ كەڭەسشىسى قىزمەتىنەن بوساتىلعان ەدى.
ەسكە سالا كەتەيىك، دونالد ترامپقا پورنوجۇلدىز ستورمي دەنيەلسكە 130 مىڭ دوللار تولەۋ ءىسى بويىنشا ايىپ تاعىلعان بولاتىن.