ترامپ يزرايل مەن يران اراسىندا اتىستىڭ تولىق توقتاتىلعانىن جاريالادى

استانا. KAZINFORM - كەلىسىم ا ق ش پەن قاتاردىڭ بىرلەسكەن دەلدالدىعىنىڭ ناتيجەسى بولدى، دەپ حابارلايدى Kazinform مەنشىكتى ءتىلشىسى.

ا ق ش پرەزيدەنتى دونالد ترامپ يزرايل مەن يران اراسىندا 12 كۇنگە سوزىلعان قارۋلى قاقتىعىستى توقتاتۋعا باعىتتالعان «اتىستى تولىق جانە تۇپكىلىكتى» توقتاتۋ تۋرالى رەجيمىنە قول جەتكىزىلگەنى تۋرالى جاريالادى. بۇل تۋرالى ول دۇيسەنبى كۇنى كەشكە Truth Social پلاتفورماسىندا جاريالانعان رەسمي مالىمدەمەسىندە حابارلادى.

- ەگەر ءبارى جوسپارلاعانداي بولسا - ءدال سولاي بولادى، - مەن ەكى ەل، يزرايل مەن يراندى قازىرگى «ون ەكى كۇندىك سوعىس» دەپ اتاۋعا بولاتىن سوعىستى توقتاتۋعا مۇمكىندىك بەرگەن توزىمدىلىك، باتىلدىق جانە اقىل-پاراساتتىلىقپەن قۇتتىقتايمىن، - دەپ جازدى امەريكا پرەزيدەنتى.

ترامپتىڭ ايتۋىنشا، اتىستى توقتاتۋ رەجيمى كەزەڭ-كەزەڭىمەن كۇشىنە ەنەدى: تاراپتار العاشقى اعىمداعى وپەراتسيالاردى التى ساعات ىشىندە اياقتايدى، ال اتىستى تولىق توقتاتۋ 24 ساعات ىشىندە جۇزەگە اسىرىلادى. ول سونداي-اق يراننىڭ رەجيمدى دەرەۋ ساقتاي باستايتىنىن، ال يزرايلدىڭ 12 ساعاتتان كەيىن ورىندايتىنىن قوسىپ ءوتتى.

Reuters اگەنتتىگىنىڭ اق ۇيدەگى دەرەككوزگە سىلتەمە جاساپ حابارلاۋىنشا، كەلىسىمگە ترامپ پەن يزرايل پرەمەر-ءمينيسترى بينيامين نەتانياحۋ تەلەفون ارقىلى سويلەسكەننەن كەيىن قول جەتكىزىلگەن.

يران تاراپىمەن كەلىسسوزگە ا ق ش ۆيتسە-پرەزيدەنتى دجەي دي ۆەنس، مەملەكەتتىك حاتشى ماركو رۋبيو جانە ا ق ش- تىڭ تاياۋ شىعىس جونىندەگى ارنايى وكىل ستيۆ ۋيتكوفف قاتىسقانى بولەك اتاپ ءوتىلدى.

Reuters اگەنتتىگى ءمالىم ەتكەندەي، يراننىڭ اتىستى توقتاتۋ تۋرالى كەلىسىمىنە قاتار پرەمەر-ءمينيسترى شەيح مۇحامماد بين ابدۋلراحمان ءال-تاني مەن يران باسشىلىعى وكىلدەرىنىڭ تەلەفون ارقىلى سويلەسۋىنەن كەيىن قول جەتكىزىلدى.

حاباردار دەرەككوزدىڭ ناقتىلاۋىنشا، بۇل اڭگىمە ا ق ش-تىڭ جەكسەنبى كۇنى يرانداعى يادرولىق نىساندارىنا جاساعان سوققىلارىنا جاۋاپ رەتىندە يراننىڭ ا ق ش-تىڭ قاتارداعى بازاسىنا زىمىراندىق شابۋىل جاساعاننان كەيىن كوپ ۇزاماي وتكەن. پرەزيدەنت ترامپ NBC News ارناسىنا بەرگەن سۇحباتىندا قول جەتكىزىلگەن كەلىسىمنىڭ ۇزاق مەرزىمدى بولاتىنىنا سەنىم ءبىلدىردى.

- مەن بۇل ءبىتىم ماڭگىلىك بولادى دەپ ويلايمىن، - دەدى ول.

يران قاتار-امەريكا ۇسىنىسىنا كەلىسەتىنىن راستادى، بۇل رەتتە يزرايل ءالى رەسمي تۇسىنىكتەمە بەرگەن جوق.

الايدا يزرايل ۇكىمەتىنىڭ دەرەككوزى بۇعان دەيىن ناۋقاندى اياقتاۋدى قالايتىنىن ءبىلدىرىپ، مۇنى ۆاشينگتونعا جەتكىزگەن.

ەسكە سالا كەتسەك، 13- ماۋسىمعا قاراعان ءتۇنى يزرايلدىڭ اسكەري-اۋە كۇشتەرى يرانعا سوققى جاسادى. تەگەراندا جارىلىستاردىڭ دىبىسى ەستىلدى. يزرايل توتەنشە جاعداي رەجيمىن جاريالاپ، ءوزىنىڭ اۋە كەڭىستىگىن جاپتى. يران يزرايل سوققىسىنان جوعارى اسكەري قولباسشىلارى مەن جەتەكشى عالىمدارى قازا تاپقانىن راستادى.

جاۋاپ رەتىندە يران يزرايل باعىتىنا 100 دەن استام ۇشقىشسىز ۇشۋ اپپاراتىن (درون) جىبەردى.

ا ق ش پرەزيدەنتى دونالد ترامپ يراننىڭ يادرولىق ينفراقۇرىلىمىنا قارسى جۇرگىزىلگەن «وتە ءساتتى» اسكەري وپەراتسيا تۋرالى مالىمدەدى.

اۆتور

زارينا تۋعانبايەۆا