ترامپ يراننىڭ يادرولىق نىساندارىن تاعى دا «جويىپ جىبەرەمىن» دەپ سەس كورسەتتى

استانا. KAZINFORM – ا ق ش پرەزيدەنتى دونالد ترامپ يراننىڭ يادرولىق نىساندارى قايتا ىسكە قوسىلاتىن بولسا، ولاردى «ساۋساعىن كوتەرىپ ۇلگەرگەنشە جويىپ جىبەرەمىن» دەپ مالىمدەدى، دەپ جازدى DW.

دۇيسەنبى كۇنى شوتلانديادا ۇلى بريتانيا پرەمەر-ءمينيسترى كير ستارمەرمەن كەزدەسۋى كەزىندە ب ا ق وكىلدەرىنە بەرگەن سۇحباتىندا ترامپ:

- ءبىز يراننىڭ يادرولىق مۇمكىندىكتەرىن جويدىق. ولار قايتا ىسكە قوسا الادى. ەگەر ولاي ەتسە، ءبىز ولاردىڭ (يادرولىق نىساندارىن) ساۋساعىڭىزدى كوتەرىپ ۇلگەرگەنشە جويىپ جىبەرەمىز، - دەدى.

21 -شىلدەدە يران سىرتقى ىستەر ءمينيسترى ابباس اراگچي Fox News تەلەارناسىنا بەرگەن سۇحباتىندا تەگەران ا ق ش- تىڭ شابۋىلدارىنا قاراماستان ۋران بايىتۋدان باس تارتپايتىنىن مالىمدەدى.

- ءبىز بۇل جۇمىستى توقتاتتىق، سەبەبى زالال وتە اۋىر بولدى. ءبىراق ءبىز ودان باس تارتا المايمىز، ويتكەنى بۇل - ءبىزدىڭ عالىمدارىمىزدىڭ جەتىستىگى، - دەدى اراگچي. ونىڭ ايتۋىنشا، ەندى بۇل - ۇلتتىق ابىرويدىڭ ماسەلەسى. بولاشاقتاعى كەز كەلگەن يادرولىق كەلىسىم يرانعا ۋران بايىتۋ قۇقىعىن بەرۋگە ءتيىس ەكەنىن دە اتاپ ءوتتى.

يران س ءى م باسشىسىنىڭ « X » (بۇرىنعى Twitter) جەلىسىندەگى جازباسى:

28 -شىلدەدە يران سىرتقى ىستەر ءمينيسترى X الەۋمەتتىك جەلىسىندە:

- ەگەر اگرەسسيا تاعى قايتالانسا، ءبىز بۇدان دا قاتاڭ ءارى جاسىرىنۋعا كەلمەيتىن جاۋاپ قايتارامىز، - دەپ جازدى.

سول جازباسىندا ول تاعى دا تەگەراننىڭ ۋران بايىتۋدى جالعاستىرۋى قاجەت ەكەنىن ايتتى:

- ءبارى ءبىلسىن: ءبىز، يراندىقتار، بەيبىت يادرولىق باعدارلامامىزدى ساتىپ العان جوقپىز - ونى قانمەن، تەرمەن جانە كوز جاسىمەن قۇردىق. ءبىزدىڭ ادام رەسۋرستارىمىز ازىرلەگەن تەحنولوگيا مەن نوۋ-حاۋدى بومبالارمەن جويۋ مۇمكىن ەمەس، - دەدى ول.

22 -ماۋسىمعا قاراعان ءتۇنى ا ق ش اسكەريلەرى يراننىڭ يادرولىق باعدارلاماسىنا قاتىستى ءۇش نىسانعا اۋە شابۋىلىن جاسادى - ولار فوردو، ناتانز جانە يسفاحان قالالارىنداعى وبەكتىلەر.

دونالد ترامپ سول كەزدەگى حالىققا ۇندەۋىندە:

— يراننىڭ ۋران بايىتۋعا ارنالعان نەگىزگى نىساندارى جويىلدى، - دەپ مالىمدەدى.

يران بيلىگى شابۋىل فاكتىسىن راستاعانىمەن، ونىڭ ورنى تولماس زالال كەلتىرمەگەنىن العا تارتتى.

ەسكە سالا كەتەيىك، يران سىرتقى ىستەر ءمينيسترىنىڭ ورىنباسارى ابباس اراكچي يران ۋراندى بايىتۋ جۇمىستارىن جالعاستىرادى جانە بۇل قۇقىعىنان باس تارتپايتىنىن مالىمدەگەنىن جازعان ەدىك.