ترامپ يرانمەن تىكەلەي كەلىسسوز جۇرگىزىپ جاتىر

استانا. KAZINFORM - دونالد ترامپ ا ق ش- تىڭ يرانمەن تىكەلەي كەلىسسوز جۇرگىزىپ جاتقانىن مالىمدەپ، 12- ساۋىردە وتەتىن ماڭىزدى كەزدەسۋ تۋرالى جاريالادى، دەپ حابارلايدى DW اقپارات اگەنتتىگى.

ا ق ش پرەزيدەنتى ەگەر تاراپتار يادرولىق كەلىسىمگە قول جەتكىزە الماسا، تەگەرانعا «ۇلكەن قاۋىپ» تونەدى دەپ قورقىتتى.

- ءبىز يرانمەن تىكەلەي كەلىسسوز جۇرگىزىپ جاتىرمىز جانە ولار قازىردىڭ وزىندە باستالدى، - دەدى ول 7-ساۋىردە يزرايل پرەمەر- ءمينيسترى بينيامين نەتانياحۋمەن كەزدەسۋدەن كەيىن اق ۇيدە تىلشىلەرگە.

اق ءۇي باسشىسىنىڭ ايتۋىنشا، الداعى سەنبى، 12-ساۋىردە «وتە ماڭىزدى تىكەلەي، ءىس جۇزىندە جوعارى دەڭگەيدە كەزدەسۋ» وتەدى دەپ جوسپارلانعان.

ترامپ يراندى «ۇلكەن قاۋىپ تونەدى» دەپ قورقىتتى

- مەنىڭ ويىمشا، ءبارى كەلىسىمگە قول جەتكىزۋگە قولايلى بولادى دەپ كەلىسەدى، - دەپ قوستى ترامپ.

ايتپەسە، كەلىسسوز ءساتسىز اياقتالسا، ول يراندى «ۇلكەن قاۋىپ تونەدى» دەپ قورقىتتى.

- يراننىڭ يادرولىق قارۋى بولۋى مۇمكىن ەمەس جانە ەگەر كەلىسسوز ءساتتى بولماسا، بۇل يران ءۇشىن وتە جامان كۇن بولادى دەپ ويلايمىن، - دەدى اق ءۇي باسشىسى.

ترامپتىڭ ايتۋىنشا، ول نەتانياحۋمەن كەزدەسۋىندە يران تاقىرىبىن تالقىلاعان.

يران سىرتقى ىستەر ءمينيسترى: كەزدەسۋ وماندا وتەدى

يران سىرتقى ىستەر ءمينيسترى ابباس اراگچي تەگەران مەن ۆاشينگتون اراسىندا جوسپارلانعان كەلىسسوز تۋرالى راستاپ، ولاردىڭ جاناما سيپاتىن بەلگىلەدى. كەزدەسۋ وماندا وتەدى جانە «ءارى مۇمكىندىك، ءارى سىناق» ەكەنىن ءتۇسىندىردى.

- دوپ امەريكانىڭ الاڭىندا، - دەپ جازدى اراگچي X ميكروبلوگتارى جەلىسىندە.

بۇعان دەيىن يران باسشىلىعى ا ق ش اكىمشىلىگىمەن تىكەلەي كەلىسسوزدەن باس تارتقانىمەن، جاناما ديالوگقا دايىن ەكەنىن تانىتتى.

يران پرەزيدەنتى ماسۋد پەزەشكياننىڭ ايتۋىنشا، تەگەران ترامپتىڭ حاتىنا ومان ارقىلى جاۋاپ بەرگەن. بۇل رەتتە قۇراما شتاتتار تاراپىنان شابۋىلدان قاۋىپتەنگەن يراننىڭ رۋحاني جەتەكشىسى اياتوللا ءالي حامەنەي ەلدىڭ قارۋلى كۇشتەرىن جوعارى دايىندىققا شاقىردى.