ترامپ: تەگەران تۇرعىندارى شۇعىل ەۆاكۋاتسيالانۋى ءتيىس

استانا. KAZINFORM — ا ق ش پرەزيدەنتى دونالد ترامپ TruthSocial جەلىسىندە جاريالاعان جازباسىندا تەگەرانداعى بارلىق تۇرعىنداردى شۇعىل تۇردە ەۆاكۋاتسيالانۋعا شاقىردى، دەپ جازدى BBC.

- يران بۇل «كەلىسىمگە» قول قويۋى كەرەك ەدى، مەن ولاردان سونى تالاپ ەتتىم. وكىنىشتى، قانشا ورىنسىز قازا بولدى. قاراپايىم تىلمەن ايتقاندا، يران يادرولىق  قارۋ قولدانباۋى ءتيىس. مەن بۇل تۋرالى قايتا-قايتا ايتىپ كەلەمىن! بارلىعى تەگەراننان شۇعىل تۇردە ەۆاكۋاتسيالانۋى كەرەك! ، - دەلىنگەن ترامپتىڭ جازباسىندا.

ترامپتىڭ مالىمدەمەلەرى ءجيى تۇسىنىكسىز بولعاندىقتان، بۇل جولى ناقتى نەنى مەڭزەگەنى بەلگىسىز.

BBC ءتىلشىسى ەنتوني زۋركەر، قازىرگى تاڭدا ترامپپەن بىرگە كاناداداعى «ۇلكەن جەتىلىك» سامميتىندە جۇرگەن، پرەزيدەنتتىڭ باسپا ءسوز بايلانىستارى جونىندەگى كومەكشىسىنەن تۇسىنىكتەمە سۇراعان. الايدا ول جۋرناليستى اق ءۇيدىڭ باسپا ءسوز قىزمەتىنە جۇگىنۋگە كەڭەس بەرگەن.

تەگەراننان ەۆاكۋاتسيا تۋرالى تۆيتتەن كەيىن ترامپ وسى تاقىرىپقا قاتىستى تاعى بىرنەشە قىسقا جازبا جاريالادى.