ترامپ تاعى ءبىر تەلەجۇرگىزۋشىنى مينيستر ەتىپ تاعايىنداماق

استانا. KAZINFORM - ا ق ش-تىڭ جاڭادان سايلانعان پرەزيدەنتى دونالد ترامپ كولىك ءمينيسترى قىزمەتىنە شون داففيدى ۇسىندى، دەپ جازادى NBC News.

شون داففي - بۇرىنعى كونگرەسسمەن جانە ول دا ترامپ وتكەن اپتادا قورعانىس ءمينيسترى ەتىپ سايلاعان پيت حەگسەت سياقتى Fox تەلەارناسىنىڭ جۇرگىزۋشىسى بولىپ جۇمىس جاسايدى.

دونالد ترامپ ۆيسكونسيننەن شىققان رەسپۋبليكاشىل شون داففيدى «كورنەكتى ءارى ءبارى جاقسى كورەتىن مەملەكەتتىك قىزمەتكەر» دەپ سيپاتتادى.

«كونگرەسستەگى ۋاقىتىندا شون رەسپۋبليكالىق كونفەرەنسيادا فيسكالدى جاۋاپكەرشىلىكتى، ەكونوميكالىق ءوسۋدى جانە اۋىلدى دامىتۋدى جاقتايتىن قۇرمەتتى سپيكەر بولدى»، - دەدى دونالد ترامپ.

شون داففي «X» الەۋمەتتىك جەلىسىندەگى مالىمدەمەسىندە: «راحمەت، پرەزيدەنت مىرزا. مەن سىزگە كولىكتىڭ التىن ءداۋىرىن باستاۋعا كومەكتەسۋگە اسىقپىن» دەپ جازدى.

بۇل قىزمەت سەناتتىڭ ماقۇلداۋىن تالاپ ەتەدى. كادر ساياساتى باسقارماسىنىڭ مالىمەتىنشە، كولىك مينيسترلىگىندە 58 مىڭعا جۋىق ادام جۇمىس ىستەيدى.

53 جاستاعى شون داففي 2011-2019 -جىلدار ارالىعىندا وكىلدەر پالاتاسىندا قىزمەت ەتكەن. ول قارجى قىزمەتتەرى كوميتەتىنىڭ مۇشەسى ءارى قاداعالاۋ جانە تەرگەۋ جونىندەگى كىشى كوميتەتتىڭ ءتوراعاسى بولدى. ول 2019 -جىلدىڭ قىركۇيەگىندە بالاسىنىڭ جۇرەك اۋرۋىمەن تۋاتىنىن بىلگەننەن كەيىن كونگرەسستەن كەتىپ قالدى.

وكىلدەر پالاتاسىنا سايلانعانعا دەيىن شون داففي ۆيسكونسين شتاتىنداعى اشلەندتە ارنايى پروكۋرور، سودان كەيىن اشلەند وكرۋگىنىڭ پروكۋرورى بولدى.

بۇعان دەيىن ترامپ ءوزىنىڭ بولاشاق اكىمشىلىگىنە العاشقى تاعايىنداۋلاردى جاريالاعان بولاتىن. سودان كەيىن ول پەنتاگون مەن س ر ۋ باسشىلارىن اتادى جانە ماسكقا ۇكىمەتتىڭ تيىمدىلىك دەپارتامەنتىن باسقارۋدى ۇسىندى.

ول سونداي- اق دەنساۋلىق ساقتاۋ مينيسترلىگىنىڭ باسشىسى لاۋازىمىنا كىشى كەننەديدىڭ كانديداتۋراسىن ۇسىندى، ا ق ش مەملەكەتتىك دەپارتامەنتى مەن ۇلتتىق بارلاۋ باسقارماسىنىڭ باسشىلارىن جانە اق ۇيدىڭ جاڭا باسپا ءسوز حاتشىسىن تاعايىندادى.

سونىمەن قاتار، ترامپ ا ق ش-«تىڭ ەنەرگەتيكا ءمينيسترى لاۋازىمىنا Liberty Energy مۇناي كومپانياسىنىڭ باسشىسىن ۇسىندى.

اۆتور
ەركەجان سماعۇلوۆا