ترامپ سەيسەنبىدە پۋتينمەن اڭگىمەلەسەدى

استانا. KAZINFORM - ا ق ش پرەزيدەنتى دونالد ترامپ سەيسەنبى كۇنى رەسەي پرەزيدەنتى ۆلاديمير پۋتينمەن سويلەسۋدى جوسپارلاپ وتىرعانىن مالىمدەدى، دەپ حابارلايدى CNBC.

- سەيسەنبى كۇنى مەن پرەزيدەنت پۋتينمەن سويلەسەمىن. دەمالىس كۇندەرى كوپ جۇمىس جاسالدى، - دەپ حابارلادى ترامپ فلوريدادان ۆاشينگتونعا قايتقاندا Air Force One بورتىندا تىلشىلەرگە.

ترامپ ۋكراينا وتكەن اپتادا قابىلداعان 30 كۇندىك اتىستى توقتاتۋ تۋرالى ۇسىنىسقا قاتىستى پۋتيننىڭ قولداۋىن الۋعا تىرىسىپ وتىر.

- ءبىز بۇل سوعىستى اياقتاي الۋ- الماۋىمىزدى كورگىمىز كەلەدى. مۇمكىن قولىمىزدان كەلەدى، مۇمكىن كەلمەيدى. ءبىراق مەنىڭ ويىمشا، بىزدە وتە جاقسى مۇمكىندىك بار، - دەدى ترامپ.

ا ق ش پرەزيدەنتى رەسەيلىك ارىپتەسىمەن جەر، ەلەكتر ستانتسيالارى جانە باسقا دا ماسەلەلەر بويىنشا سويلەسەتىنىن ايتتى.

بۇعان دەيىن حابارلانعانداي، ا ق ش پرەزيدەنتىنىڭ ارنايى وكىلى ستيۆ ۋيتكوفف CNN گە بەرگەن سۇحباتىندا دونالد ترامپ پەن ۆلاديمير پۋتين كەلەسى اپتادا تاعى دا تەلەفون ارقىلى سويلەسۋى مۇمكىن ەكەنىن ايتتى.