ترامپ ەر-ريادتا سيريا پرەزيدەنتىمەن كەزدەستى

استانا. KAZINFORM – ا ق ش سانكسيالارىنىڭ الىنۋى اياسىندا دونالد ترامپ سيريا پرەزيدەنتى احمەد اش-شاراامەن العاشقى رەسمي كەزدەسۋ وتكىزىپ، ۆاشينگتون مەن داماسك اراسىنداعى قارىم-قاتىناستىڭ جاڭا كەزەڭىن اشتى، دەپ حابارلايدى Kazinform ءتىلشىسى.

ا ق ش پرەزيدەنتى دونالد ترامپ سارسەنبى كۇنى ساۋد ارابياسىندا سيريانىڭ ۋاقىتشا پرەزيدەنتى احمەد اش-شاراامەن كەزدەستى. بۇل - ەكى ەل باسشىلارىنىڭ سوڭعى 25 جىلداعى العاشقى كەزدەسۋى.

ا ق ش پەن سيريا پرەزيدەنتتەرىنىڭ كەزدەسۋى اق ءۇي باسشىسى سيرياعا قارسى بارلىق سانكسيالارى جويىلاتىنىن مالىمدەگەننەن كەيىن ءوتتى.

تۇركيا پرەزيدەنتى رەجەپ تايىپ ەردوعان دا ترامپ، اش-شارا جانە ساۋد ارابياسىنىڭ مۇراگەر حانزاداسى مۇحاممەد بين سالمان اراسىنداعى كەزدەسۋگە ۆيدەو بايلانىس ارقىلى قوسىلدى.

- كەزدەسۋ بارىسىندا ەردوعان ترامپتى سيرياعا سالىنعان سانكسيالاردى الىپ تاستاعانى ءۇشىن ماداقتاپ، سيريانىڭ بەيبىتشىلىگى مەن گۇلدەنۋىن ىلگەرىلەتۋ ءۇشىن ساۋد ارابياسىمەن بىرگە جۇمىس ىستەۋ مىندەتىن ءوز موينىنا الدى، دەپ حابارلادى اق ءۇي.

جاۋاپ رەتىندە ترامپ ەردوعان مەن بين سالمانعا دوستىق قاتىناستارى ءۇشىن العىس ايتىپ، اش-شارااعا «ءوز ەلىندە تاريحي دۇنيە جاساۋعا» ۇلكەن مۇمكىندىك بار ەكەنىن ايتتى.

اق ءۇيدىڭ باسپا ءسوز حاتشىسى كەرولاين ليەۆيتتىڭ مالىمدەمەسىنە سايكەس، ترامپ سيريا باسشىسىن يزرايلمەن اۆرااموۆ كەلىسىمىنە قول قويۋعا، شەتەلدىك لاڭكەستەردىڭ جويىلۋىن قامتاماسىز ەتۋگە، ا ق ش- قا د ا ي ش- ءتىڭ قايتا جاندانۋىنىڭ الدىن الۋعا كومەكتەسۋگە جانە سيريانىڭ سولتۇستىك-شىعىسىنداعى د ا ي ش- ءتىڭ ۋاقىتشا ۇستاۋ ورتالىقتارى ءۇشىن جاۋاپكەرشىلىكتى الۋعا شاقىردى.

جاۋاپ رەتىندە اش-شاراا كەزدەسۋدى ۇيىمداستىرعانى ءۇشىن ترامپ، ەردوعان جانە بين سالمانعا العىس ايتىپ، سيريانىڭ شىعىس پەن باتىس اراسىنداعى ساۋدانى جەڭىلدەتەتىن ماڭىزدى بۋىنعا اينالاتىنىنا ۋادە بەردى جانە امەريكالىق كومپانيالاردى سيريانىڭ مۇنايى مەن گازىنا ينۆەستيتسيا سالۋعا شاقىردى.

- ترامپتىڭ پارسى شىعاناعى ىنتىماقتاستىق كەڭەسىنىڭ جەتەكشىلەرىمەن ءسامميتى اياسىندا وتكەن كەزدەسۋ سيرياداعى وقيعالاردىڭ ماڭىزدى بەتبۇرىستارىن كورسەتەدى، دەپ جازادى Associated Press.

بۇل ترامپپەن بەتپە-بەت كەزدەسۋ سيريانىڭ حالىقارالىق وقشاۋلانۋىن توقتاتۋعا كومەكتەسەتىنىنە سەنگەن سيريالىقتار مەن ولاردىڭ تۇرىك جانە ساۋديالىق وداقتاستارىنىڭ بىرنەشە ايلىق ديپلوماتياسىنىڭ شارىقتاۋ شەگى بولدى.

بۇعان دەيىن سيريا ۇكىمەتى ترامپ اكىمشىلىگىنە سيريا مۇنايىنا قول جەتكىزۋ، يزرايلدىڭ قاۋىپسىزدىگىنە كەپىلدىك بەرۋ جانە داماسكىدە «ترامپ مۇناراسىن» سالۋ تۋرالى ۇسىنىستى جىبەرگەن بولاتىن.

ا ق ش پەن ساۋد ارابياسى 142 ميلليارد دوللارلىق قارۋ-جاراق كەلىسىمىنە قول قويدى.