ترامپ پەن ماسك ۇزاق ۇزىلىستەن سوڭ قايتا بىرگە كوپشىلىك الدىنا شىقتى

استانا. KAZINFORM - ا ق ش پرەزيدەنتى دونالد ترامپ پەن كاسىپكەر يلون ماسك 21-قىركۇيەك كۇنى اريزونا شتاتىندا وتكەن مارقۇم چارلي كيرككە ارنالعان قوشتاسۋ راسىمىنە قاتىستى. بۇل - ولاردىڭ مامىر ايىندا ارالارىندا كەلىسپەۋشىلىك تۋىنداعاننان كەيىن العاش رەت كوپشىلىك الدىندا بىرگە بوي كورسەتۋى، دەپ حابارلادى Lianhe Zaobao باسىلىمى.

CNN حابارلاۋىنشا، ءىس-شارا سپورت ارەناسىندا ۇيىمداستىرىلىپ، ترامپ پەن ماسك پرەزيدەنتتىك لوجادا قاتار وتىرىپ، اڭگىمەلەسكەن. ب ا ق-قا تۇسىرىلگەن كادرلاردا ولاردىڭ قول الىسىپ، جىلى شىراي تانىتقانى بايقالدى. كەيىنىرەك ماسك الەۋمەتتىك جەلىدە ترامپپەن سويلەسىپ وتىرعان ساتىنەن سۋرەت جاريالاپ، وعان «چارلي ءۇشىن» دەپ جازدى.

قورعانىس ءمينيسترى پيت حەگسەستىڭ ءسوز سويلەپ تۇرعان كەزىندە دە ترامپ پەن ماسك قىزۋ اڭگىمەگە بەرىلىپ، قول قيمىلدارىمەن پىكىر الماسىپ وتىرعانى كوزگە ءتۇستى. ماسك اڭگىمە بارىسىندا ءجيى باس يزەپ، كوڭىل قويا تىڭداعان. بۇل ولاردىڭ مامىر ايىندا ماسك مەملەكەتتىك قىزمەتتەن كەتكەننەن كەيىنگى العاشقى بىرلەسكەن رەسمي كورىنىسى بولدى.

جۋرناليستەردىڭ سۇراقتارىنا جاۋاپ بەرگەن ترامپ: «ول (ماسك) كەلىپ سالەمدەستى. قارىم-قاتىناسىمىز وتە جاقسى»، - دەپ اتاپ ءوتتى. اقپارات كوزدەرىنىڭ مالىمەتىنشە، كيرك ەكى تاراپتىڭ بايلانىسىن قالپىنا كەلتىرۋگە دانەكەرلىك جاساعان. ول ماسكپەن تۇراقتى بايلانىستا بولىپ، ءتۇرلى ساياسي ماسەلەلەر جونىندە پىكىر الماسىپ وتىرعان.

ايتا كەتەيىك، 31 جاستاعى كونسەرۆاتيۆتى كوزقاراستاعى بەلسەندى چارلي كيرك - ترامپتىڭ جاقىن سەرىكتەسى. ول 10-قىركۇيەكتە يۋتا القابىنداعى ۋنيۆەرسيتەتتە سويلەپ تۇرعان كەزىندە قاستاندىق جاسالىپ، قازا تاپقان بولاتىن.

اۆتور

دانا نۇرباقىت