ترامپ پەن ەپشتەين 15 جىل بويى دوستىق قارىم-قاتىناستا بولعان

استانا. KAZINFORM — ا ق ش پرەزيدەنتى دونالد ترامپ پەن كامەلەتكە تولماعانداردى ازعىردى دەپ ايىپتالعان امەريكالىق قارجىگەر دجەففري ەپشتەين شامامەن 15 جىل بويى دوس بولعان، دەپ جازادى The New York Times.

ولار 1990-جىلداردىڭ شاماسىندا تانىسقان. سول كەزدە ەپشتەين فلوريداداعى ترامپتىڭ مار-ا- لاگو رەزيدەنتسياسىنا جاقىن ماڭنان ءۇي ساتىپ العان. ەكەۋى ءجيى ارالاسقان، ءبىر-ءبىرىنىڭ ۇيلەرىنە قوناققا بارعان، ءتۇرلى كەشتەر ۇيىمداستىرىپ، وعان مودەلدەردى شاقىرعان.

ولاردىڭ دوستىعى شامامەن 2004-جىلى توقتاعان. قارىم-قاتىناستىڭ ۇزىلۋىنە سەبەپ - ەكەۋىنىڭ دە فلوريداداعى پالم-بيچ جاعالاۋىنداعى ءبىر ءزاۋلىم ءۇيدى ساتىپ العىسى كەلگەنى. بۇل مۇلىكتىك باسەكەدە ترامپ جەڭىسكە جەتىپ، ءۇيدى 41 ميلليون دوللارعا ساتىپ العان.

NYT مالىمەتىنە قاراعاندا، ترامپ كەيىن جاقىن اينالاسىنا ەپشتەيننەن الىستاپ كەتۋىنىڭ تاعى ءبىر سەبەبىن ايتقان. بەلگىلى بولعانداي، ەپشتەين مار-ا-لاگو كلۋبىنىڭ ءبىر مۇشەسىنىڭ قىزىنا ورىنسىز قىلىق كورسەتكەن.

ەپشتەين 2019-جىلعى 6-شىلدەدە نيۋ-يورك شتاتىندا ۇستالدى. پروكۋراتۋرا ونىڭ 2002-2005-جىلدارى مانحەتتەندەگى ۇيىنە ونداعان كامەلەتكە تولماعان قىزداردى (ەڭ كىشىسى 14 جاستا) شاقىرعانىنا دالەل بار ەكەنىن مالىمدەدى. ەپشتەيننىڭ دوستارى مەن تانىستارى اراسىندا ا ق ش پەن وزگە ەلدەردىڭ قازىرگى جانە بۇرىنعى شەنەۋنىكتەرى، بۇرىنعى مەملەكەت باسشىلارى، ءىرى كاسىپكەرلەر مەن شوۋ-بيزنەس جۇلدىزدارى بولعان.

ەپشتەينگە قاتىستى قىلمىستىق ءىس 2019-جىلعى 10-تامىزدا تۇرمە كامەراسىندا ءوز-وزىنە قول جۇمساعاننان كەيىن توقتاتىلدى.

بۇعان دەيىن ا ق ش دجەففري ەپشتەيننىڭ كليەنتتەر ءتىزىمىن جاريالاۋدى جوسپارلاپ وتىرعانىن العا تارتتى.

ال ا ق ش پرەزيدەنتى دونالد ترامپ The Wall Street Journal باسىلىمىن سوتقا بەرەمىن دەپ قورقىتىپ، ەپشتەين ءىسىنىڭ كەيبىر ماتەريالدارىن جاريالاۋدى تالاپ ەتتى.