ترامپ ۋكراينانى سايلاۋ وتكىزۋگە شاقىردى
استانا. KAZINFORM - سەيسەنبى كۇنى ا ق ش پرەزيدەنتى دونالد ترامپ ۋكراينا پرەزيدەنتى ۆلاديمير زەلەنسكيدى اۋىستىرۋى ىقتيمال سايلاۋ وتكىزىلۋى تيىستىگىن مالىمدەدى.
بۇل جايىندا New York Post باسىلىمى جازدى، دەپ حابارلايدى kazinform اگەنتتىگىنىڭ مەنشىكتى.
- بىزدە ۋكراينادا سايلاۋ بولماعان، دۇرىسىندا ۋكراينادا اسكەري جاعداي قولدانىلاتىن احۋال قالىپتاسىپ وتىر، - دەپ مالىمدەدى دونالد ترامپ امەريكالىق دەلەگاتسيا ساۋد ارابياسىندا رەسەيلىك رەسمي تۇلعالارمەن كەلىسسوزدەر اياقتاعاننان كەيىن مار-ا-لاگودا وتكەن باسپا ءسوز ءماسليحاتىندا.
ترامپ زەلەنسكيدىڭ العاش رەت 2019 -جىلى سايلانعانىن جانە ساۋالناما ۋكراينالىق پرەزيدەنتتىڭ 50 پايىزدان ءسال جوعارى باعالاناتىندىعىن كورسەتكەنىنە قاراماستان «ماقۇلداۋ رەيتينگى 4 پايىز» عانا ەكەنىن مالىمدەدى.
ۋكرايناداعى پرەزيدەنتتىك سايلاۋ 2024 -جىلدىڭ ءساۋىر ايىنا جوسپارلانعان ەدى. الايدا، 2022 -جىلدىڭ اقپان ايىنان بەرى ەل اسكەري جاعدايدا بولعاندىقتان سايلاۋ وتكىزىلگەن جوق.
2023 -جىلى زەلەنسكي ەل قورعانىسقا ۇيىسۋ قاجەت كەزدە سايلاۋ وتكىزۋ «ساياسي الاۋىزدىققا» الىپ كەلەتىندىگىن ايتقان بولاتىن.
ترامپتىڭ زەلەنسكيگە قاتىستى ريتوريكاسى پۋتينمەن تەلەفون ارقىلى سويلەسكەننەن سوڭ جانە كومانداسى ساۋد ارابياسىندا كەلىسسوزدەر جۇرگىزگەننەن كەيىن سوڭعى اپتادا وزگەرىپ وتىر.
- ولار ۇستەل باسىنان ورىن العىسى كەلگەن كەزدە حالىق مۇنى جاساۋ كەرەكتىگىن ايتۋعا دا بولادى. ۋكراينا حالقى «بىزدە سايلاۋ ءبىراز ۋاقىتتان بەرى وتپەگەنىن بىلەسىزدەر مە؟» دەپ ايتپاۋى ءتيىس پە ەدى، - دەدى دونالد ترامپ ۋكراينانىڭ كەزدەسۋگە قاتىسۋ نيەتىنە جاۋاپ رەتىندە.
سونىمەن قاتار ا ق ش پرەزيدەنتى ءوزىنىڭ ۋكراينادا سايلاۋ وتكىزۋ قالاۋىن رەسەيدىڭ ءىسى ەمەس ەكەنىن باسا ايتتى.
- بۇل مەنىڭ، كوپتەگەن وزگە دە ەلدىڭ ايتىپ وتىرعانى. بىلەسىزدەر مە، ۋكراينا قۇرىپ بارادى، - دەدى ول.
مۇنان ارى ترامپ زەلەنسكيدى ا ق ش ۋكرايناعا بۇكىل سوعىس كەزىندە بولگەن قاراجاتتى ءتيىمسىز پايدالاندى دەپ ايىپتادى.
- بەرگەن اقشانىڭ ءبارى قايدا؟ قايدا كەتتى؟ مەن بۇل جايىندا ەش ۋاقىتتا ەسەپ-قيساپ كورگەن ەمەسپىن. ءبىز جۇزدەگەن ميلليارد دوللار بەرەمىز. ەشقانداي ەسەپ-قيسابىن كورىپ وتىرعانىم جوق. سوندىقتان مەن تىنىشتىق كورگىم كەلەدى، - دەدى دونالد ترامپ.
سونداي-اق ا ق ش پرەزيدەنتى ۋكراينا رەسەيمەن سوعىس «باستاعان» ەل بولعاندىعىن مالىمدەدى.
- جۇمىستىڭ ىستەلگەنىن ويلايمىن. ەندى بىزدە مۇلدەم باستالۋى ءتيىس ەمەس سوعىستىڭ جالعاسۋىنا مۇمكىندىك بەرگەن باسشىلىق بار، - دەپ اتاپ ءوتتى دونالد ترامپ.
ا ق ش مەملەكەتتىك حاتشىسى ماركو رۋبيو ساۋد ارابياسىنداعى كەلىسسوزدەر بارىسىندا رەسەيگە سالىنعان سانكسيالاردى الىپ تاستاۋ ماسەلەسى تالقىلانباعانىن ايتىپ وتىر.
- ازىرشە اڭگىمەنىڭ ونداي دەڭگەيىنە جەتكەن جوقپىز. ءبىراق، مۇنى ءىس بارىسىندا تالقىلاۋعا تۋرا كەلەرى ءسوزسىز. ءبىز بۇل پروتسەستى باستاعان دا ەمەسپىز. بۇگىن وسى ماسەلەلەردى تالقىلاۋ ءۇشىن پروتسەستى باستاۋعا كەلىسۋ عانا بولدى، - دەدى ول.
ال ۆلاديمير زەلەنسكي رەسەيدىڭ الەۋەتتى بەيبىت جوسپاردىڭ بولىگى رەتىندە ۋكراينادا جاڭا سايلاۋ وتكىزۋگە تىرىساتىندىعىن العا تارتىپ، بۇل يدەيانى سىنادى. ول رەسەي پرەزيدەنتى ۆلاديمير پۋتين تاراپىنان «ۋلتيماتۋمعا» كەلىسپەيتىندىگىن مالىمدەدى.
ايتا كەتەيىك، كەشە ساۋد ارابيا استاناسى ەر-رياد قالاسىندا ا ق ش پەن رەسەي دەلەگاتسياسى العاش رەت بەيبىت كەلىسسوزدەر وتكىزدى. 4,5 ساعاتقا سوزىلعان كەزدەسۋگە ۋكركينا وكىلدەرى قاتىسقان جوق.