ترامپ ۋكرايناعا جەتكىزىلەتىن قارۋ-جاراق كولەمىن ۇلعايتپاق

استانا. KAZINFORM – ا ق ش پرەزيدەنتى دونالد ترامپ 7-شىلدە كۇنى كەشكە ۋكرايناعا كوبىرەك قارۋ جەتكىزىلەتىنىن مالىمدەدى. ونىڭ ايتۋىنشا، بۇل قارۋ-جاراق نەگىزىنەن قورعانىس سيپاتىندا بولماق.

ءبىز كومەك كورسەتۋىمىز كەرەك. ۋكراينا ءوزىن قورعاۋعا مۇمكىندىك الۋى ءتيىس. قازىر ولارعا وتە اۋىر سوققىلار جاسالىپ جاتىر، - دەدى ترامپ يزرايل پرەمەر-ءمينيسترى بينيامين نەتانياحۋمەن اق ۇيدەگى رەسمي كەشكى اس كەزىندە.

سونىمەن قاتار ترامپ 3-شىلدە كۇنى رەسەي پرەزيدەنتى ۆلاديمير پۋتينمەن وتكىزگەن تەلەفون اڭگىمەسىنە كوڭىلى تولماعانىن العا تارتتى:

ول (پۋتين) سوڭىنا دەيىن بارعىسى كەلەدى، ادامداردى ءولتىرۋدى جالعاستىرا بەرمەك - مۇنىڭ سالدارى اۋىر بولماق، - دەدى ا ق ش باسشىسى.

سول ءتۇنى-اق رەسەي اسكەرى ۋكرايناعا رەكوردتىق كولەمدە - 550 زىمىران جانە درون جىبەرگەنى حابارلاندى.

وسىلايشا، ا ق ش ۋكرايناعا بۇرىن ۋاقىتشا توقتاتىلعان اسكەري كومەكتىڭ ءبىر بولىگىن قايتا جەتكىزۋدى كوزدەپ وتىر. بۇل شەشىم ترامپتىڭ ارنايى وكىلى كيت كەللوگ پەن ۋكراينا قورعانىس ءمينيسترى رۋستەم ۋمەروۆ اراسىنداعى جوعارى دەڭگەيدەگى ەكى كەزدەسۋدەن كەيىن قابىلدانباق.

ءبىرىنشى كەزدەسۋ 10-11-شىلدە كۇندەرى ريمدە وتەتىن ۋكراينانى قالپىنا كەلتىرۋ جونىندەگى حالىقارالىق كونفەرەنسيادا جوسپارلانعان، ال ەكىنشى كەزدەسۋ بىرنەشە كۇننەن كەيىن كيەۆتە وتەدى.

ايتا كەتەيىك، 2-شىلدەدە ا ق ش- تىڭ ۋكرايناعا كەيبىر وق-دارىلەردى، اتاپ ايتقاندا، Patriot جۇيەسىنە ارنالعان زىمىران-پەرەحۆاتشىلاردى، Stinger زەنيتتىك-زىمىران كەشەندەرىن، NASAMS اۋە قورعانىس جۇيەسى مەن F-16 جويعىشتارىنا ارنالعان زىمىرانداردى جەتكىزۋدى ۋاقىتشا توقتاتقاندىعى بەلگىلى بولدى. ساراپشىلاردىڭ پىكىرىنشە، بۇل شەشىم ۋكراينا قارۋلى كۇشتەرىنىڭ كۇشەيىپ كەلە جاتقان رەسەي اۋە شابۋىلدارىنا تويتارىس بەرۋ مۇمكىندىگىنە ەلەۋلى زيان كەلتىرۋى مۇمكىن.

بۇعان دەيىن ا ق ش- تىڭ قازاقستانعا % باج سالىعىن ەنگىزەتىنى تۋرالى جازعانبىز.