ترامپ ۋكرايناعا امەريكالىق قارۋ جەتكىزىلەتىنىن مالىمدەدى

استانا. KAZINFORM - ا ق ش پرەزيدەنتى دونالد ترامپ ناتو مەن ا ق ش ۋكرايناعا قارۋ جەتكىزۋ تۋرالى كەلىسىمگە قول جەتكىزگەنىن مالىمدەدى، دەپ جازدى Kazinform اگەنتتىنىڭ مەنشىكتى ءتىلشىسى.

اقپارات ABC News سايتىندا جارىق كورگەن دەرەككە نەگىزدەلگەن.

ا ق ش پرەزيدەنتى بۇل مالىمدەمەنى اق ۇيدە ناتو باس حاتشىسى مارك ريۋتتەمەن كەزدەسۋ بارىسىندا جاسادى. ترامپتىڭ ايتۋىنشا، «ميللياردتاعان دوللار» تۇراتىن قارۋ-جاراق ا ق ش- تىڭ قورعانىس ونەركاسىبىندە ءوندىرىلىپ، ەۋروپالىق مەملەكەتتەردىڭ قاراجاتى ەسەبىنەن قارجىلاندىرىلماق.

- بۇگىن ءبىز كەلىسىمگە كەلدىك: ءبىز ولارعا قارۋ بەرەمىز، ال ولار اقىسىن تولەيدى. ا ق ش بۇل ءۇشىن ەشقانداي تولەم المايدى. ءبىز بۇل قارۋدى ساتىپ المايمىز، ءبىراق ءوزىمىز شىعارامىز، ال اقىسىن ولار تولەيدى، - دەدى اق ءۇي باسشىسى.
ءوز كەزەگىندە ناتو باس حاتشىسى مارك ريۋتتە بۇل كەلىسىمدى «ناعىز اۋقىمدى مامىلە» دەپ اتاپ، «ەۋروپالىقتار بەلسەندىلىك تانىتىپ وتىر» دەدى.

- بۇل ۋكرايناعا اۋە شابۋىلىنان قورعانۋ جۇيەلەرىن، زىمىراندار مەن وق-دارىلەردى قامتيتىن ۇلكەن كولەمدەگى اسكەري تەحنيكا الۋعا مۇمكىندىك بەرەدى، - دەدى ريۋتتە.
سونداي-اق، ول بۇل كەلىسىمگە قوسىلۋعا نيەتتى «ءبىرقاتار ەلدەرمەن بايلانىستا» ەكەنىن ايتتى.

بۇعان دەيىن حابارلانعانداي، ترامپ ناتو باس حاتشىسىمەن كەزدەسۋدە رەسەي مەن ۋكراينا اراسىنداعى قاقتىعىستى رەتتەۋ بويىنشا 50 كۇن ىشىندە كەلىسىم جاسالماسا، رەسەيگە قارسى سانكتسيا ەنگىزەتىنىن ەسكەرتكەن بولاتىن.