ترامپ كاليفورنيادا ميتينگ وتكىزگەلى جاتقاندا تاپانشاسى بار ەر ادام ۇستالدى

استانا. KAZINFORM - كاليفورنيادا ا ق ش پرەزيدەنتتىگىنە كانديدات دونالد ترامپتىڭ ميتينگىسى ءوتىپ جاتقان جەردىڭ ماڭىندا قارۋلى ەر ادام ۇستالدى، دەپ جازادى BBC.

ريۆەرسايد وكرۋگىنىڭ شەريفى چاد بيانكونىڭ ايتۋىنشا، لاس-ۆەگاستىڭ 49 جاستاعى تۇرعىنى ۆام ميللەر ترامپ كوشە قيىلىسىندا سويلەر الدىندا ءبىر ساعات بۇرىن ۇستالدى - ول قارا ءتۇستى جول تالعامايتىن كولىكتە بولعان. قولىندا شولاق مىلتىق، وقتالعان تاپانشا بولعان.

پوليتسيا سونداي-اق ونىڭ بىرنەشە ءتولقۇجاتى مەن جۇرگىزۋشى كۋالىگى دە بولعانىن ايتادى.

ەر ادام بۇعان دەيىن قارۋ-جاراق پەن وق-دارىلەردى زاڭسىز ساقتادى دەگەن ايىپپەن قاماۋعا الىنىپ، كەيىن 5000 دوللار كەپىلدىكپەن بوساتىلعان. ونىڭ تىڭداۋى كەلەسى جىلدىڭ 2-قاڭتارىنا بەلگىلەنگەن.

بيلىك وقيعانىڭ ترامپ پەن ميتينگىگە قاتىسۋشىلار قاۋىپسىزدىگىنە اسەر ەتپەگەنىن ايتتى.

جەرگىلىكتى پوليتسيانىڭ حابارلاۋىنشا، ءتارتىپ ساقشىلارى دونالد ترامپقا جاسالعان قاستاندىق ارەكەتتىڭ جولىن كەستى. ءبىراق وقيعاعا قاتىستى كوپ سۇراق جاۋاپسىز قالدى.

اۆتور
ەركەجان سماعۇلوۆا