ترامپ جەل ەنەرگەتيكاسىن دامىتۋ باعدارلاماسىن توقتاتتى

استانا. KAZINFORM - ا ق ش پرەزيدەنتى «وففشورلىق جەل ەنەرگەتيكاسىنا» قاتىستى جوبالار بويىنشا جۇمىستى توقتاتۋعا بۇيرىق بەردى، دەپ حابارلايدى Euronews.

مۇحيت ەنەرگەتيكاسىن باسقارۋ بيۋروسى (BOEM) تەحاس، لۋيزيانا، مەن، نيۋ-يورك، كاليفورنيا جانە ورەگون جاعالاۋلارىندا، سونداي-اق ورتالىق اتلانت مۇحيتىندا تۋربينا سالۋ ءۇشىن 1,42 ميلليون گەكتاردان استام جەردى ءبولۋ تۋرالى شەشىمىن وزگەرتتى.

بۇل - دونالد ترامپ اكىمشىلىگىنىڭ ەلدىڭ ەنەرگەتيكالىق ساياساتىنداعى وزگەرىستى تانىتاتىن كەزەكتى قادام.

وتكەن جىلى ا ق ش- تىڭ سول كەزدەگى پرەزيدەنتى دجو بايدەن جەل ەنەرگەتيكاسىن دامىتۋ ءۇشىن فەدەرالدى قايراڭدى ايماقتاردى جالعا الۋدىڭ بەس جىلدىق كەستەسى تۋرالى جاريالادى.

الايدا ترامپ قىزمەتىنە كىرىسكەننەن بەرى بۇرىنعى باسشىنىڭ شەشىمدەرىن بىرتىندەپ وزگەرتتى. وسىلايشا، ول مۇناي، گاز جانە كومىر ءوندىرۋدى ۇلعايتۋعا باعىتتالعان ءبىرقاتار اتقارۋشى بۇيرىقتارعا قول قويدى.

وتكەن اپتادا ا ق ش ىشكى ىستەر ءمينيسترى داگ بۋرگۋم سەنىمسىز دەپ اتالعان جەل جانە كۇن ەلەكتر ستانسيالارى ءۇشىن جەڭىلدىك رەجيمى توقتاتىلاتىنىن جاريالادى.

سونداي-اق ەنەرگيانى دامىتۋدى جەردى پايدالانۋدىڭ باسقا تۇرلەرىمەن تەڭەستىرۋ ءۇشىن قۇرلىقتاعى جەل الەۋەتى جوعارى فەدەرالدىق جەر ۋچاسكەلەرىن الىپ قويۋ ماسەلەسى قاراستىرىلىپ وتىر.

اق ءۇي باسشىسىنىڭ قازبا وتىندى پايدالانۋ باعدارلاماسى بۇعان دەيىن كليمات عالىمدارى مەن ەكولوگتەردىڭ سىنىنا ۇشىراعان بولاتىن.

ولار ا ق ش ەنەرگەتيكا مينيسترلىگىن كليماتتىڭ وزگەرۋى مەن جاھاندىق جىلىنۋ ماسەلەلەرىن، سونداي-اق بۇكىل الەمدەگى كليماتتىق اپاتتار مەن ەكسترەمالدى اۋا رايى جاعدايلارىن ەلەمەيدى دەپ ايىپتاپ وتىر.

شوتلاندياعا ساپارى كەزىندە ترامپ ەۋروپالىق كوميسسيا ءتورايىمى ۋرسۋلا فون دەر ليايەنمەن وتكەن باسپا ءسوز ءماسليحاتىندا جەل ەنەرگياسىن «جۇمىس ىستەمەيتىن» «الاياقتىق» دەپ اتادى.

بۇعان دەيىن كۇن ەنەرگياسى العاش رەت ە و- دا نەگىزگى ەنەرگيا كوزىنە اينالعانىن جازعان بولاتىنبىز.