ترامپ حارريس ەكەۋىنىڭ اراسىندا وتەتىن پىكىرتالاستان باس تارتتى
استانا. KAZINFORM - ا ق ش- تىڭ بۇرىنعى پرەزيدەنتى دونالد ترامپ Fox News تەلەارناسىنىڭ 24 نەمەسە 27-قازاندا پىكىرتالاس وتكىزۋ ۇسىنىسىنان باس تارتتى.
«پروتسەسس شەكتەن شىعىپ كەتتى، داۋىس بەرۋ باستالدى - رەماتچ بولمايدى!»، - دەپ جازدى د. ترامپ Truth Social الەۋمەتتىك جەلىسىندە.
د. ترامپ سونداي-اق بۇعان دەيىن Fox News ارناسىنان 4-قىركۇيەكتە كامالا حارريسپەن دەباتقا قاتىسۋعا شاقىرۋدى قابىلداعانىن، ءبىراق قارسىلاسى ودان باس تارتقانىن ەسكە سالدى.
رەسپۋبليكالىق ساياساتكەر ساۋالنامادا الدا كەلە جاتقانىن، سوندىقتان قارسىلاسىمەن الشاقتىق كۇن سايىن ارتىپ كەلە جاتقانىن قوسىپ ءوتتى. ونىڭ پىكىرىنشە، پىكىرتالاستى قايتا جالعاستىرۋدىڭ ءمانى جوق، ويتكەنى ك. حارريس ا ق ش پرەزيدەنتى دجو بايدەننىڭ ساياساتىندا ەشتەڭە وزگەرتپەيدى. ترامپ سونىمەن قاتار ونىڭ كانديداتتىق سەرىكتەسى دجەي دي ۆەنستىڭ جاقىندا وتكەن پىكىرتالاستا دەموكراتيالىق قارسىلاسى تيم ۋولتستى «قيىندىقسىز جەڭگەنىن» اتاپ ءوتتى.
ا ق ش پرەزيدەنتتىگىنە كانديداتتار كامالا حارريس پەن دونالد ترامپ قاراشا ايىنداعى سايلاۋ الدىندا ABC News ارناسىنىڭ تىكەلەي ەفيرىندە سايلاۋ الدىنداعى العاشقى جانە ىقتيمال جالعىز تەلەدەباتىن وتكىزدى.
كەيىن دونالد ترامپ ءوزىنىڭ باسەكەلەسى، دەموكراتيالىق پارتيادان ۇمىتكەر كامالا حارريسپەن ەندى سايلاۋالدى پىكىرتالاسقا قاتىسپايتىنىن مالىمدەدى.
ا ق ش- تا كەلەسى پرەزيدەنت سايلاۋى 5-قاراشاعا بەلگىلەنگەن.