ترامپ ءۇندىستان مەن پاكىستانداعى قاقتىعىستى شەشۋگە كومەكتەسۋگە دايىن ەكەنىن مالىمدەدى

استانا. KAZINFORM - ا ق ش پرەزيدەنتى دونالد ترامپ ءۇندىستان مەن پاكىستان باسشىلىعىنا ەكى ەل اسكەري كۇش قولدانۋ ارقىلى تۋىنداعان شيەلەنىستى ەڭسەرۋگە كومەكتەسۋگە دايىن ەكەنىن ايتتى، دەپ حابارلايدى ت ا س س.

امەريكالىق كوشباسشى مۇنى اق ۇيدە جۋرناليستەرمەن سۇحباتىندا راستادى.

- مەن ولاردىڭ توقتاعانىن قالايمىن. ولار توقتاي الادى دەپ ۇمىتتەنەيىك. سوعان سەنەمىز. ەگەر مەن كومەكتەسۋ ءۇشىن بىردەڭە ىستەي السام، سوندا بولامىن، - دەدى ترامپ نيۋ-دەلي مەن يسلاماباد اراسىنداعى قارىم-قاتىناستىڭ كۇرت ناشارلاۋىنا تۇسىنىكتەمە بەرىپ.

ترامپ ءۇندىستان-پاكىستان قارىم- قاتىناسىنداعى شيەلەنىستەرگە دە توقتالدى.

- بۇل قورقىنىشتى. مەن ەكەۋىمەن دە (ەلدەرمەن) ءتىل تابىسامىن. مەن ەكى ەلدى دە جاقسى بىلەمىن جانە ولاردىڭ وسى ماسەلەنى شەشكەنىن قالايمىن، - دەپ قوستى پرەزيدەنت.

ەسكە سالا كەتسەك، 22 - ءساۋىر كۇنى قارۋلى ادامدار دجاممۋ مەن كاشمير وداعى اۋماعىنداعى ايگىلى تۋريستىك قالا - پاحالگامدا تەررورلىق شابۋىل جاساعان بولاتىن. اسكەري كيىم كيگەن ادامدار اۆتوماتتارمەن وق جاۋدىرعان، 25 ءۇندى ازاماتى مەن 1 نەپالدىق قازا تاپتى. قىلمىسكەرلەر وقيعا ورنىنان قاشىپ ۇلگەرگەن.

ءۇندىستان پاحالگامداعى تەراكتىدەن كەيىن پاكىستانعا قارسى شارالار جاريالادى.

ءۇندىستان كاشميردەگى پاكىستان باقىلاۋىنداعى ايماقتارعا سوققى جاساعانىن مالىمدەدى.