ترامپ ب ر ي ك س ەلدەرى دوللاردان باس تارتقان جاعدايدا باج سالىعى سالىناتىنىن ەسكەرتتى
استانا. KAZINFORM - ا ق ش- تىڭ جاڭادان سايلانعان پرەزيدەنتى دونالد ترامپ سەنبى كۇنى ب ري ك س- كە مۇشە ەلدەر ا ق ش دوللارىنا نۇقسان كەلتىرەتىن ارەكەتتەرگە بارسا، وسى مەملەكەتتەرگە % 100 باج سالىعىن قوياتىنىن ەسكەرتتى، دەپ حابارلايدى AP.
«ءبىز بۇل ەلدەردەن ب ر ي ك س- ءتىڭ جاڭا ۆاليۋتاسىن ەنگىزبەۋدى نەمەسە ا ق ش دوللارىن الماستىراتىن كەز كەلگەن باسقا ۆاليۋتانى قولداماۋ تۋرالى مىندەتتەمەنى تالاپ ەتەمىز. ەگەر ولار وسىنداي قادامعا بارسا، 100 پايىزدىق باج سالىعىنا تاپ بولادى جانە ا ق ش- تىڭ قۋاتتى ەكونوميكاسىمەن ساۋدا- ساتتىق جاساۋدان شەتتەتىلەدى»، - دەدى ترامپ Truth Social سايتىنداعى جازباسىندا.
ونىڭ وسى مالىمدەمەسى برازيليا، رەسەي، ءۇندىستان، قىتاي جانە وڭتۇستىك افريكا كىرەتىن ب ر ي ك س اليانسى دەپ اتالاتىن ەلدەرگە باعىتتالعان. بۇل ەلدەردەن باسقا اليانس قۇرامىنا مىسىر، ەفيوپيا، يران جانە بىرىككەن اراب امىرلىكتەرى قوسىلدى.
سونىمەن قاتار بىرنەشە مەملەكەت ب ري ك س- كە قوسىلۋ تۋرالى وتىنىشتەرىن بەردى.
ا ق ش دوللارى جاھاندىق بيزنەستە ەڭ كوپ قولدانىلاتىن ۆاليۋتا سانالعانىمەن، اليانس مۇشەلەرى مەن باسقا دا دامۋشى ەلدەر امەريكانىڭ جاھاندىق قارجى جۇيەسىندەگى ۇستەمدىگىنەن شارشاعانىن العا تارتىپ وتىر.
بۇعان دەيىن دونالد ترامپ قىتاي، مەكسيكا جانە كانادا تاۋارلارىنا جاڭا تاريف ەنگىزۋدى جوسپارلاپ وتىرعانىن جاريالادى.