ترامپ: ا ق ش يراننىڭ ۋران بايىتۋ نىساندارىن تولىقتاي جويدى

ۆاشينگتون. KAZINFORM - ا ق ش پرەزيدەنتى دونالد ترامپ امەريكالىق اسكەردىڭ يراننىڭ ءۇش يادرولىق نىسانىنا ءساتتى سوققى جاساعاننان كەيىن حالىققا ۇندەۋ جولدادى.

اق ءۇي باسشىسى قۇراما شتاتتاردىڭ قارۋلى كۇشتەرى يران رەجيمىنىڭ ءۇش ماڭىزدى يادرولىق نىسانىنا - فوردو، ناتانز جانە يسفاحانعا دالدىكپەن، اۋقىمدى سوققىلار جاساعانىن حابارلادى.

- ءبىزدىڭ ماقساتىمىز - يراننىڭ ۋران بايىتۋ ينفراقۇرىلىمىن جويۋ جانە بۇكىل الەمگە يادرولىق قاۋىپ ءتوندىرىپ وتىرعان، تەرروريزمنىڭ باستى دەمەۋشىسى سانالاتىن مەملەكەتتەن بۇل قاۋىپتىڭ كوزىن قۇرتۋ. بۇگىن بۇكىل الەمگە ايتا الامىن: بۇل سوققىلار - ايرىقشا اسكەري جەتىستىك، - دەدى دونالد ترامپ.
پرەزيدەنتتىڭ ايتۋىنشا، يراننىڭ نەگىزگى يادرولىق نىساندارى تولىقتاي جويىلعان.

- ەندى يران بەيبىت كەلىسىمگە كەلۋى كەرەك. ەگەر ونداي شەشىم قابىلدانباسا، كەلەسى شابۋىلدار ودان دا اۋقىمدى بولادى، - دەپ ەسكەرتتى ترامپ.
ترامپ يزرايل پرەمەر-ءمينيسترى بينيامين نەتانياحۋدى جەكە اتاپ ءوتىپ، ونىمەن ءبىر كوماندا رەتىندە جۇمىس ىستەگەنىن جانە يزرايلگە تونگەن قاۋىپتى جويۋ ءۇشىن بىرگە ارەكەت ەتكەنىن جەتكىزدى.

پرەزيدەنت سونداي-اق اسكەري وپەراتسياعا قاتىسقان امەريكالىق جاۋىنگەرلەردى قۇتتىقتاپ، ولارعا العىسىن ءبىلدىردى. ول بۇل وپەراتسيانىڭ سوڭعى ونداعان جىلدا الەمدە بولماعان اۋقىمدا وتكەنىن اتاپ ءوتتى.

- بىزگە بۇل اسكەردىڭ قىزمەتى بۇدان بىلاي قاجەت بولمايدى دەپ ۇمىتتەنەمىن. نەمەسە بەيبىتشىلىك ورنايدى، نەمەسە يران سوڭعى سەگىز كۇندە كورگەنىنەن دە قورقىنىشتى تراگەديامەن بەتپە-بەت كەلەدى، - دەدى ا ق ش پرەزيدەنتى.
سونىمەن قاتار، ترامپ يران اۋماعىندا ءالى دە كوپتەگەن اسكەري نىسان بار ەكەنىن ەسكە سالدى.

- ەگەر بەيبىتشىلىك جاقىن ارادا ورناماسا، ءبىز بۇل نىسانداردى بىرنەشە مينۋتتا جويىپ جىبەرەمىز، - دەپ ەسكەرتتى ول.
دونالد ترامپ قۇراما شتاتتاردىڭ جاساعانىن الەمنىڭ بىردە-ءبىر ارمياسى ىستەي الماس ەدى دەپ تۇيىندەدى.

ەسكە سالايىق، بۇعان دەيىن ا ق ش يراننىڭ يادرولىق نىساندارىنا سوققى جاساعانى حابارلانعان بولاتىن.