ترامپ ا ق ش- تىڭ سيرياعا قارسى سانكسيالارىن الىپ تاستادى

استانا. KAZINFORM – ا ق ش پرەزيدەنتى دونالد ترامپ ا ق ش- تىڭ سيرياعا قارسى ەكونوميكالىق سانكسيالارىن الىپ تاستاۋ تۋرالى جارلىققا قول قويدى. اق ءۇي بۇل شەشىمدى «تۇراقتىلىق پەن بەيبىتشىلىككە قادام» دەپ باعالادى. بۇل تۋرالى BBC حابار تاراتتى.

- ا ق ش تۇراقتى، ءبىرتۇتاس، وزىمەن جانە كورشىلەرىمەن بەيبىت ءومىر سۇرەتىن سيرياعا قولداۋ كورسەتۋگە مىندەتتەلەدى. تەررورلىق ۇيىمدارعا قاۋىپسىز باسپانا بەرمەي، ءدىني جانە ەتنيكالىق ازشىلىقتاردىڭ قاۋىپسىزدىگىن قامتاماسىز ەتەتىن ءبىرتۇتاس سيريا ايماقتىق قاۋىپسىزدىك پەن وركەندەۋدى قولدايدى، - دەلىنگەن بۇيرىقتا.

رەسەيگە قاشىپ كەتكەن سيريانىڭ بۇرىنعى پرەزيدەنتى باشار اسادقا، ونىڭ وتباسى مۇشەلەرىنە جانە بيلىكتەن قۋىلعان رەجيمدى جاقتاۋشىلارعا قارسى سانكسيالار كۇشىندە.

ترامپ ەر-ريادتا سيريانىڭ جاڭا باسشىسى احمەد اش-شاراامەن كەزدەسۋ الدىندا مامىر ايىندا سيرياعا سالىنعان سانكسيالاردى الىپ تاستايتىنىن ايتتى.

اق ءۇي سيريانىڭ جاڭا ۇكىمەتىنىڭ ارەكەتتەرىن، سونىڭ ىشىندە «يزرايلمەن قارىم-قاتىناستى قالىپقا كەلتىرۋ ءۇشىن ناقتى قادامدار جاساۋدى» قاداعالايتىنىن جەتكىزدى.

ا ق ش پرەزيدەنتى دونالد ترامپ بۇگىن سيرياعا قارسى امەريكالىق سانكسيالاردى جەڭىلدەتۋ تۋرالى جارلىققا قول قوياتىنىن جازعان بولاتىنبىز.