- ەگەر ومان جولىمىزدى كەسسە، ءبىز ونى تۇك قالتىرماي بومبالايمىز، - دەدى ترامپ Fox News- ءتىڭ باس حالىقارالىق ءتىلشىسى ترەي ينستپەن تەلەفون ارقىلى سويلەسۋىندە.
ينست ەفيردەن ترامپتىڭ ورمۋز بۇعازىنىڭ مارتەبەسى بويىنشا ومان مەن يران اراسىنداعى كەلىسسوز تۋرالى سۇراققا بەرگەن جاۋابىن جاريالادى. الايدا سۇحباتتىڭ اۋديوجازباسى بەرىلمەگەن.
سول كۇنى اقۇيدەگى جۋرناليستەرمەن كەزدەسۋدە تىلشىلەر ترامپتان ەفيردە ايتىلعان ءسوزدى ناقتىلاۋىن سۇرادى.
- مەن ولار وزدەرىن دۇرىس ۇستامادى، دەپ ويلامايمىن. ءبىراق ءبىز باسقا ماسەلەلەردى شەشكەنىمىز سياقتى، ولارمەن دە وڭاي ءتىل تابىسار ەدىك، - دەدى دونالد ترامپ.
يەمەن، ب ا ءا جانە ساۋد ارابياسىمەن شەكارالاس ءارى ورمۋز بۇعازىنا جاقىن ورنالاسقان ومان يرانمەن وسى ماڭىزدى تەڭىز جولى بويىنشا كەلىسسوز جۇرگىزىپ جاتىر.
سەنبى كۇنى يراننىڭ جارتىلاي رەسمي Mehr News اقپارات اگەنتتىگى يراننىڭ ومانمەن سۋ جولى ارقىلى كەمە قوزعالىسى بويىنشا كەلىسىمگە كەلگەنىن حابارلادى.
تەڭىز ترافيگىن باقىلاۋ جونىندەگى MarineTraffic قىزمەتىنىڭ مالىمەتىنشە، ورمۋز بۇعازىنداعى كەمە قاتىناسى دەمالىس كۇندەرى ءىس جۇزىندە توقتاپ قالعان، تەك 13 كەمە ءوتتى، ونىڭ ۇشەۋى جەكسەنبى كۇنى وتكەن.
دۇيسەنبى كۇنى ا ق ش پەن يراننىڭ ماۋسىم ايىنداعى سوعىستى توقتاتۋعا جانە يراننىڭ يادرولىق باعدارلاماسى بويىنشا كەلىسىمگە كەلۋگە بەلگىلەگەن 60 كۇندىك مەرزىمى اياقتالدى.
ترامپتىڭ قوقان-لوقىسىنا جاۋاپ رەتىندە دەموكرات سەناتور تيم كەين دۇيسەنبى كۇنى سەنات تامىز ايىنداعى دەمالىسىنان ورالعان سوڭ، ومانعا قارسى اسكەري ارەكەتتەرگە تىيىم سالاتىن سوعىس وكىلەتتىكتەرى تۋرالى زاڭعا سايكەس قارار ەنگىزۋدى جوسپارلاپ وتىرعانىن ايتتى، دەپ حابارلايدى JNS.
كەين ترامپتىڭ «ومانعا شابۋىل جاسايمىن» دەپ قورقىتۋى پرەزيدەنتتىڭ «الەم بويىنشا سوعىس ءورتىن تۇتاتىپ، قوقان-لوقى كورسەتۋ ناۋقانى ارقىلى ەسىنەن اداسىپ بارا جاتقانىن» دالەلدەيتىنىن ايتتى.
- مەن بۇل سوقىر، بيلىككە ماستانعان پرەزيدەنتتىڭ ا ق ش پەن الەمگە بۇدان دا كوپ زيان كەلتىرۋىنە جول بەرمەيتىن رەسپۋبليكاشىل ارىپتەستەرىم تابىلاتىنىنا ۇمىتتەنەمىن، - دەدى سەناتور.
بۇعان دەيىن ا ق ش پرەزيدەنتى دونالد ترامپ جاقىن ارادا ورمۋز بۇعازىن امەريكا قۇراما شتاتتارىنىڭ اۋماعى دەپ جاريالاۋ نيەتىن مالىمدەگەن بولاتىن.